Pynbna ka MCA ban kyrshan sa ia ka lympung 1st Garo Hills Tribal Cricket League

Shillong, Naiwieng 20 : Da ka jingthmu ban kyntiew ia ka jingialehkai cricket hapdeng ki jaidbynriew trai ri trai muluk ka Jylla, ka Meghalaya Cricket Association (MCA) kala rai ban kyrshan ia ka lympung ialehkai Maitshaphrang Khasi League jong ka Khasi Students Union (KSU) kumba la pynbna ha ka taiew bala lah bad mynta kan kyrshan sa ia lympung 1st Garo Hills Tribal Cricket League.

Ia kane ka lympung kaban pynlong ha Ri Lum Garo ka dei ka jingshimti bad kit khlieh ka jong u Vice Presdient ka MCA u Sengnab Momin, ha kaba u la lum la lang ruh da ka jingialang bad ki riew ieit  ia ka jingialehkai cricket, kaba la long ha ka 18 tarik mynta u bnai, ha kaba ki nongkit kam ki kynhun ialehkai kriket ki la poi sha ka jingialang ba la long ha madan ialehkai jong ka Alotgre, Tura, ha kaba la rai ban thaw syndon ia kawei ka komiti naka bynta ban pyntyllun shakhmat ia kane ka lympung.

Dei ha kane ka jingialang, ba la pdiang bad mynjur ia ka nam bad ka kyrteng jong kane ka lympung ka 1st  Garo Hills Tribal Cricket League, ha kaba ia ka sngi bad ka tarik ban sdang ban pynlong ia kane ka lympung yn sa pynbna da ka jingialang kaban long ha Mendipathar.

Kumta, ka MCA ka dap shisha da ka mynsiem kaba sngewkmen bad pynpaw ia ka jingsngewnguh ia baroh kiba la shim lem ia ka jingkit khlieh naka bynta ban rah ia ka khubor shaphang ka jingthmu ban pynlong ia kane ka lympung ha Ri Lum Garo, kaban long artad kum ka jingsdang ban thang ia u saihon u ban sa pynrhem ia ka mynsiem ialehkai jong ki khun samla kane ka dong ka thain bad ban lah ruh ban ioh ban sei madan ia ki sap ba nylla jong ki, khnang ban ioh ia ka lad ban jied pat ia ki naka bynta ban mihkhmat ia ka jylla ha ki kyrdan iakhun ba kham shalor.