Shillong, Naiwieng 20 : U Symbud Myntri Rangbah ba khmih ia ka Tnad Pynroi Sor Bah Sniawbhalang Dhar ha ka sngi Palei, ula pynbna ban sa pynpra noh ia ka Iingdorbar Thaw Ain barim ha Khyndailad na ka bynta ban pyntrei ia ka Khyndailad beautification project.
Kat kum ka jingong jong u, ka jingpynitynnad (beautification) ia ka Khyndailad kala nang iaid shakhmat bad yn sa pyntrei pura ia ka hadien ba dep pynkynriah ia ka Assembly sha ka jaka ba thymmai ha Mawdiangdiang.
Haba iakren bad ki nongthoh khubor, u Bah Sniawbha ula ong “Phi tip bha ba ia ka Iingdorbar Thaw Ain barim yn dang ban pynkynriah sha ka jaka ba thymmai. Tang mar syn dep pynkynriah sha ka jaka thymmai, ngin sdang shaid shaid ban pynitynnad ia kane ka jaka”.
Ula bynrap ba ka Detailed Project Report (DPR) kala jan dep, ka ban batai ia ki jingthmu ban pynpra ia ka Building jong ka Iingdorbar Thaw Ain barm bad ban shna noh da ki jaka iaid kai ki paidbah,ki lynti iaid kjat, ki jaka thung syntiew bad kiwei kiwei.
“Ngi la pynkhreh ia ka DPR bad ka dei kaba itynnad bha. Kumta, lehse ynda la dep lut nadong hadong, yn sa khot noh ia ka tender. Ia ka Iingdorbar Thaw Ain barim yn sa pynpra noh kat kum ka plan, kata ruh ka ban sa iashim rai, ban shna ia ki lynti iaid kjat ba itynnad-baroh ki don lut ha ka DPR”.
Haba iadei bad ka MTC Shopping Mall, ula pyntip ba ka jingpyndep ia kane ka jingtei la buh ban long ha u snem ban wan, bad kumba 85-88 % na ki kam kila dep mynta.
“Ka sngi bala buh ban pyndep ka dei ban long ha u snem ban wan. Kyrmen skhem, to ngin ap ia kane ka sngi bad ynda poi katei ka por ngan sa lah ban ong ia kiei kiei baroh” ula bynrap.
