Shillong, Naiwieng 20 : Ka Sorkar Jylla ha ryngkat ka jingiatreilang bad ka India AI Mission jong ka Ministry of Electronics & Information Technology, ka Sorkar India, kin pynlong ia ka Regional AI Impact Conference ha State Convention Cente, Shillong ha ka 3 tarik Nohprah.
Kane ka conference ka dei shibynta jong ki conference ba pynlong ha kylleng ka Ri kum ka jingpynkhreh ia ka India-AI Impact Summit 2026.
Ka Tnad Information Technology & Communication ka Sorkar Jylla, ka dei ka nodal department ban pyniaid ia kane ka Conference bad ka IIM Shillong kala shah jied kum ka Knowledge Partner na ka bynta kane.
Halor ka matpdeng “AI for CE (Artificial Intelligence for Citizens’ Empowerment): Smarter Governance, Better Lives,” kane ka conference kan wanrah lang hajuh ia ki Heh Ophisar ka Jylla, ki nongialam haki kam karkhana, ki kompani technology ka pyrthei, ki jaka pule, bad ki kompani ba dang sdang (startups) ban iakren halor ka bynta jong ka AI ban wanrah jingkylla ha ka jingiakhun ia ka jingkylla ka suinbneng, ka synshar khadar kaba treikam bha, bad ka jingwanrah ia ka imlang sahlang kaba kham shngain bad iadei dur.
Kan don ruh ka jingbatai na ka kynhun India AI Mission ban pyni ia ki buit bapher bapher ba iadei bad ka AI bala pyndonkam da ka Sorkar India.
Ryngkat kane, kan don ruh ka rynsan ban ai jaka ïa ki nongshim bynta bapher bapher ba kin pyni ïa ki jingthmu & jingpynwandur jong ka AI, ki jingïalang ai jingmut bad jingïamir jingmut, bad ka jingïadei hapdeng ki briew/seng kiba don kajuh ka jingmut jingpyrkhat .
U Myntri Rangbah ka Jylla Conrad K Sangma ula ai ka jingmynjur ban iadonlang ha kane ka conference kum u kongsan.
Kane ka confercne kan sakhi ruh ia ka jingpynlait paidbah ia ka Bhashini Hackathon (ha ka ktien Garo & Khasi ), ka jingpynlait ia ka MeghDEE program, ka jingiasoi ia ka MoU ban buh ia ka Data & AI Lab, bad ka jingiasoi ia ka MoU bad ka MATH T-Hub.
U Myntri ka Minitry of Electronics and Information Technology bad ki Heh Ophisar na ki Ministry ka Sorkar Pdeng bad ki Jylla ka thain Shatei Lam Mihngi, la khmih lynti ba kin iadonlang ha kane ka jingialang.
U Myntri Rangbah ka Jylla Conrad K Sangma uba peit ruh ia ka Tnad Information Technology & Communication ka Sorkar Jylla, ula pynkhreh ban pynbna ia ka policy ba kongsan ha kane ka conference ka ban pynpaw ia ka Meghalaya kum ka nongsdang ban pyndonkam ia ka AI ha ka thain bad ka jaka pynmih ia ki technology bapher bapher.
Ha kane ka conference kan don ruh ka jingialang hapdeng u Myntri Rangbah ka Jylla bad ki nongkynshew kam kiba paw, da ka jingthmu ban pynlong ia ka Meghalaya kum ka jaka ba dang kiew ha ka jingpyndonkam ia ka kor digital bad ka Innovation hub na ka bynta ka thain lam Mihngi ka ri India.
Nalor kane, kan don ruh ka jingpyni nam ha kane ka juh ka jaka, ka ban pyni ia ki technology AI ba dang thymmai ba la pynmih da ki Tnad Sorkar, ki karkhana bad ki jaka pule leh research bad jaka pule.
Kum ka jingpynkhreh ia kane ka conference ban long la 3 tarik Nohphrah, katto katne ki jingialap kila iaid ha ki jaka pule kum ka IIM Shillong, NIT Meghalaya bad NIELIT, Shillong, kiba la sdang ban pynsngewthuh ia ki samla pule halor ka AI” ong u Pravin Bakshi, Commissioner & Secretary ka Tnad IT &C.
