Shillong, Naiwieng 14: U Lat ka jylla Meghalaya CH Vijayashankar, u la bthah ia ka tnat Social Welfare ba kan lum ia ka thup jingtip ba bniah halor ka jingdon khynnah ki bym iohi ki khmat naduh ba dang kha bad kiba duna ka bor iohi hadien bla kha khnang ban ioh wad ia ki lad ki lynti ban iarap ia ki.
U Lat ka Jylla u la kdew ba ki don ki khynnah kiba la duh noh ïa ka bor iohi ki khmat namar ki jingjia aksiden ne ki jingpang bad kine ki lah ban dang iohi biang lada biang ka rukom sumar.
U la ban jur ia ka jingdonkam ia ka jingkyrshan jong ki nongai jingiarap bad ka jingsumar kaba biang.
U la pyntip ba ki don katto katne ki hospital, khamtam ha Kerala, ki don ki lad ban sumar ïa ki khynnah kiba hapoh 14 snem kiba don ïa ki jingpang duna haka bor iohi ki khmat bad ki ai daki jingsumar ba kyrpang jong ka Ayurvedic na ka bynta ki khmat.
Na ka bynta ki khynnah kiba duna haka bor iohi ki khmat, u Lat ka Jylla u la ong, ka rukom sumar kaba 15 sngi ka lah ban pynbha shibun ia ka bor iohi jong ki lada don ka jingbudien man ka por.
U a pynthikna ba ka Sorkar kan kyrpad ia kane ka Hospital ban pdiang ia ki khynnah na Meghalaya ban ioh jingsumar.
Ia kane u Lat ka Jylla u la kren ha ka prokram ba kyrpang kaba la lum lang ïa ki khynnah kiba don ïa ki sap bapher bapher ha Raj Bhavan ban rakhe ïa ka sngi kyrpang ki khynnah lane ka Children’s Day.
U Lat ka Jylla ha ryngkat ka ka kurim jong u, kila pdiang bad ai khublei ïa ki khynnah bad pynpaw ïa ka jingkordor ban rakhe ïa kane ka sngi kyrpang ki khynnah lane ka Children’s Day bad ki khynnah kiba wan na ki skul bapher bapher jong ka Jylla.
U la batai ia kane ka jinglehkmen iaka sngi kyrpang ki khynnah ka don jingmut na ka bynta ka Raj Bhavan, kaba la lah ban pdiang ia ki khynnah.
Haba pynskhem biang ïa ka jingkitkhlieh jong ka Jylla na ka bynta bha miat jong ki khynnah kiba don jingduna ha ki dkhot met, u Lat ka Jylla u la ong ba un pynïar ïa baroh ki jingkyrshan kiba lah.
U la kyntu ia ka tnat ban wad bad pynroi ia ki sap jong kine ki khynnah, da kaba kdew ba bun ki lah ban pawnam kum ki nongtem, ki nongjngi lada ioh ia ka jinghikai kaba biang.
Iaka prokram Children’s Day la pynlong da ka tnad Social Welfare ha kaba la don ki jingshad ba shongshit, kynthup ïa ki jingrwai na ka kynhun tem ka GTC, ka Presentation naki khynnah Jyoti School bad ki jingrwai na ki arngut ki khynnah samla ba don jingduna ha ki dkhot met na ka skul ASHA, Shillong.
