Kyntu u Dolloi ka Narpuh ia ka Sorkar ban pynkut ia ka jingiakhih ka MCTODA

Shillong, Naiwieng 11: U Dolloi jongka Elaka Narpuh Bah Manbha Kyndoh, ula kyntu ia ka sorkar jylla ba kan pynkut noh ia ka jingiakhih kaba be-aiñ jong ka Meghalaya Commercial Truck Owners & Drivers Association (MCTODA)-kaba khang ban iaid ki trok kit dewbilat bad clinker namar ba kala ktah ia ka jingkamai jakpoh jongki paid trai ri trai muluk ka thain.

“Kane ka jingiakhih kala ktah jur ia ki trai ri trai muluk ia kaba kim shym la leh kano kano kaba bakla. Ngi sngew ba lada ym shim ia kino kino ki sienjam kiba biang da ka sorkar jylla bad ki bor pyniaid district, ka lah ban ktah lynter bad ia kaba yn ym lah shuh ban khyllie da ki trai nongshong shnong” ong u Bah Kyndoh ha ka dorkhas kaba la aiti na ka bynta ki paidbah ka Elaka sha u Deputy Commissioner ka East Jaintia Hills hynne ka sngi nyngkong.

“Na ka bynta jong ki shnong kiba hap hapoh jong kane ka Dolloiship, nga kyntu ia ki bor pyniaid district bad ia ka sorkar jylla ruh kumjuh ban pynbeit noh ia katei ka kam khlem da pynslem shuh khnang ba ngi bad ki bahaiing bahasem ngin lait na ka jingma jong ka jingshah ktah ka kamai jakpoh, ka jingsngewsih bad jingmad jingeh kaba la pynbor ia ngi da ka MCTODA bad ki kynhun kiba kyrshan ia ka, kaba ngim shim la leh satia ia kano kano kaba bakla na ka liang jong ngi” ula bynrap.

Kane ka jingiakhih kala sdang ha ka 27 tarik u Risaw kala pynsangeh ia ka jingtreikam jongki karkhana pynmih dewbilat bad kala ktah ia ki 2,500-3,000 ngut kiba iohkam bad ia ki hajar ngut kiba kamai lyngba ka jingdonbynta lang ha katei ka bynta kaba kynthup ia ki nongshalang, nongniah kali bad ki nongbylla.

Ka shnong kala mad jingeh ban ioh ia ki marbam mardih kiba kongsan bad ia ka jingshakri bad ki kam pynroi ruh kila sahkut lut.

Ha ka dorkhas la pynapw, “Kane ka jingkhang ia ki kali ban kit ia ki mar kaba la pynlong da ka MCTODA naduh ka 27 tarik u Risaw 2025 mynta kala jam sha ka sngi kaba 15 bad katkum ka jingioh jingtip ka jong ngi ki karkhana pynmih dewbilat kila sangeh treikam lut bad ka jingkamai jakpoh kaba man la ka sngi ka jong ngi kala shah ktah jur” la ong u Daloi bad ka bynrap “Katkum ka jingsngewthuh ka jong ngi bad katkum ka jingiakren bad baroh ki Rangbah Shnong jong ka Elaka, ym duna ia ka 40 ne 50 hajar ngut ki trai trai muluk kila shah ktah na kane ka jingiakhih kaba be-aiñ jong ka MCTODA kaba la ktah jur bhai a ki trai shnong. Kane ka long palat bad ka bym lah khein shuh ia ki longiing longsem jong ki nongniah kali ha ka thain, ki nongbud ne Handyman, ki dukan bam harud surok kiba im bad kamai jakpoh lyngba ka jingiaid ki trok ha kitei ki surok”.

Kala ong ba kane ka jingiakhih kala lam sha ka jingpynsangeh ia ki kam pynroi kiba la pyniaid shakhmat da kitei ki karkhana pynmih dewbilat kiba la leh lyngba ka CSR bad kane kala ktah ia ki kam pynroi ha ki shnong ki thaw.

“Ngi lah ioh ruh ia ka jingpyn sngewthuh ba ka pisa kaba la lum hapoh jongka DMF kan shah ktah namar ka jingbym lah ban treikam kine ki karkhana pynmih dewbilat bad kane kan dang iai ktah jur shuh shuh ia ki kam pynroi ha ki shnong”.

Haba kynthoh pyrshah ia ka MCTODA kaba la pynmih ia ka jingeh ha ka kamai kajih hashwa ban rakhe ia ka Khristmas, la ong ha ka Dorkhas, “Ngi ngim don shuh ia ka jingsngew ban rakhe ne ban lehkmen ia ki tamasa kiba ngi lah iai ap da ki snem bad ban don ia ka jingthmu ban ialehkmen bad sngewbha. Ha kane ka khyllipmat, ngi lah khuslai bha bad dap da ka jingbym sngewtynnad bad da ka jingsngewsih”.