Shillong, Naiwieng 5: Ki bor pyniaid district ka East Khasi Hills kala pynmih ia ka hukum kaba khang ban pynlong ia kino kino ki jingiakhih ne Rally ha ka thaiñ Mawryngkneng da kaba pynpaw ia ka jingsngewkhia halor jingsuk ia ki paidbah bad ka jingdheng kali.
Ka District Magistrate Kong RM Kurbah kala pynmih ia kane ka hukum hapoh ka kyndon 163 jong ka Bharatiya Nagarik Suraksha Sanhita (BNSS), hadien ka jingdon ka jingialum paidbah da ka Meghalaya Commercial Truck Owners and Drivers Association (MCTODA), ban iakhih bad ka jingkhang ia ki kot kit dewbilat bad clinker.
Ka hukum kala mana tyngeh ia kino kino ki briew ne kynhun ban pynlong ia ka jingiakhih ne Rally hapoh u pud ka Mawryngkneng C&RD Block. Kala mana tyngeh ruh ba ym dei ban rah ia ki tiar pynmynsaw ne kino kino ki kynja tiar kiba lah ban pyndonkam kum ki atiar kiba lah ban pynmynsaw ne buh jingma ia kiwei ki briew pat.
Ka jingpynkhein ia ka hukum kan khring sha ka jingshah pynngat ha ka kyndon 223 jongka Bharatiya Nyaya Sanhita (BNS) bad kiwei kiwei ki kyndon ain, kala ong.
Kane ka hukum kane treikam noh mardor bad kan iai treikam tad haduh ban da pynbna da kumwei pat.
