Pynrem ka HNLC ba shah kem ki samla ha Khliehshnong, Sohra

Shillong, Naiwieng 04 : Ka seng Hynniewtrep National Liberation Council (HNLC) kala pynrem jur ia ka jingshah kem ba dang shen ki 9 ngut ki samla na Khliehshnong, Sohra, hadien ka jingjia ba 31 tarik Risaw.

Kat kum ka jingong ka seng, kane ka jingjia kala wan jia namar ka jingpynbitar da ki Ophisar ka Sorkar bad ki Pulit, haba kyntait ia ka jingpyrshang ban pynman ia ka jingleh ki paidbah kum ka jingthombor u paidbhur.

Ki khyndai ngut kiba la ithuh kum ki nongkynshoit ia ki paidbah la kem hadien ba 200 ngut ki briew kila leit thombor ia ka iingsah u Bah Ham Shangpliang ha Khliehshnong, Sohra ha ka 31 tarik Risaw namar ka jingkynnoh ba dei u Menshohnoh.

“Kine ki jingkem ki long sa kawei pat ka nuksa ia ka jingleh donbor, jingpyntreikam ia ka ain da kaba shu jied ban pynlong sohpdung ia ki samla jong ngi haba pulom ban iada ia ka Hynniewtrep na ki jingma ba shisha bad ki jingleh bymhok kiba iai bteng” ong u General Secretary ka HNLC Bah Sainkupar Nongtraw ha ka kyrwoh ba pynmih ha ka sngi Ba-ar.

“Ka kynhun bala khot ki Special Operation Team bad kiwei ki bor kiba lah pyntbit, ki lah ban pyni ia ka bor ha Shillong, hynrei kila shu sngap jar ia ka jingud jong ki briew jong ngi ha ki jaka khappud. Hynrei haba ki la nud ban rung ha Khliehshnong, Sohra, kila mad ia ka jingpyrshah jong ki samla kiba shlur haduh ba kila hap kynran dien. Ha katei ka miet, ki paidbah ka Khliehshnong kila pyni ia ka mynsiem iakhun ba shisha jong ka Hima Sohra. Wat hapdeng ki atiar ba khlain bad bala dep hikai pyntbit, ki Pulit kila phet kum ki myrsiang hakhmat u Khla, khlem da lah ban ieng pyrshah ia ka jingkut jingmut bad ka jingiatylli ki samla ong ngi” ula kynnoh.

U Bah Sainkupar ula ong ba ka HNLC ka kyntait jur ia kano kano ka jingpyrshang ban pynman ia ki trai shnong kum kibym tip ain tip kanun.

“Ka jingjia ha Khliehshnong kam dei ka kam thombor u paidbah hynrei ka dei kaba mih na ka jingpyn bitar bala leh khnang da ki Ophisar ka Sorkar bad ki Pulit ha katei ka miet” ula ong haba pynpaw ia ka jingiadon ryngkat bad ki paidbah ka Khliehshnong bad pynrem ia ka jingpyrshang jong ka Sorkar ban pynngat kam bymman ia ki lanot.