Shillong Risaw 29: Ka Sorkar Jylla kala mynjur ia ka Meghalaya Village Defence Organization Rule, 2025 bad kyntiew hi nalade ia ka jingsiew ne Allowance ia ki Village Defence Party (VDP) na ka T.300 sha ka T.3000.
Ia kane ka rai la shim ha ka jingialang jong ka Kynhun Myntri hapoh ka jingialam u Myntri Rangbah u Conrad K Sangma hynne ka sngi Balang.
Haba iakren bad ki nongpathai khubor, u Myntri Sorkar uba long ruh u Nongaiktien ka sorkar MDA u Bah Wailadmiki Shylla ula ong ba katei ka rule kaba thymmai ka kdew shai ia ka kam bad ia ki kamram jong ki VDP ha ki bynta ki bapher bapher na ka jylla sha ki district.
Ka jingkyntiew ia ka jingsiew ne Allowance kadei kaba la khmih lynti ba kan pynshlur ia ki VDP ba kin lah ban trei shitom shuh shuh, khamtam eh ha kaban shimkhia ia ki kam sniew, droks bad ka jingshngain ha ki thain khappud.
“Ngi kwah ba ki VDP kin treikam bha khamtam eh haba phi tip, ngi mad ia ki jingeh na ka jingmih ki kam sniew, droks bad wat ha ki kam ha ki thain khappud. Ngi kyrmen skhem ba da kane ka kyndon ain kaba thymmai, nga tharai ngin sa lah ban pynshlur ia ki shnong ki thaw ban seng ia ki Village Defence Party (VDP)” ong u Bah Shylla.
U Myntri ula ai ksai ruh ba ka sorkar ka don ia ka jingthmu ban kyntiew noh ia ka rukom treikam ki VDP katkum ka jingiaid ka por, da kaba pynbiang ia ki uniphom, walkie-talkie bad ka rukom pynithuh kaba janai. Hynrei ula kyntait pat ban iathuh eiei halor ki tiar ialeh bad ula banjur ba ka sorkar ka dang trei ia ka bynta ban pynkhlain ia ki VDP khnang ba kin lah ban trei kham bha ban pynneh ia ka shongsuk shongsain ha ka thain.
 na ka T.300 sha ka T.3000.){kind=link}