Shillong, Risaw 28 : U Myntri ka Koit ka Khiah Bah Wailadmiki Shylla ha ka sngi Ba-ar, ula pynbna ba ka Sorkar kala rai ban pynsangeh noh ia ka Public Private Partnership (PPP) model ban pyniaid ia ka Tura Medical College bad ia kane ka jaka pule doktor yn pyniaid hi noh da ka Sorkar.
U bah Shylla ula ong ba ki paidbah kila pynpaw ia ka jingsngewkhia haba iadei bad ka PPP model bad ka Sorkar kala rai ban pynkut noh ia kane ka jingthmu khnang ban pynthikna ba ia kane ka medical college la pyniaid na ka bynta ka bha ka miat u paidbah.
“Kumba phi top ba ka Sorkar ka dei na ka bynta u paidbah, ta ka daw ngin iaid kat kum ka jingkwah u paidbah. Ta ka daw ngi la rai ba wat ka Tura Medical College kan dei noh ka College Sorkar” ula ong haba iakren bad ki nongthoh khubor.
U Myntri ka koit ka khiah ula ong ruh ba ka Sorkar kan sa sdang noh shen ban thung ia ki nonghikai na ka bynta kane ka college watla ki don ki jingeh, Ula pyntip ba bun na ki jingtei kila dep bad tang ka bynta jong ka hospital ka dei kaba dang sah.
U bah Shylla ula pyntip ba shen un sa leit ban jurip ia ka Tura Medical College bad u kwah eh ban leit jngoh ia ka ri-lum Garo.
Haba phai sha ka Shillong Medical College, u Myntri ula pyntip ba ka jingshim klas ha kane ka college kala sdang bad haduh 50 ngut ki samla pule kila don.
Ula pyntip ruh ba kane ka College kala don ia ki nonghikai kat kum ki jingbuh kyndon ka National Medical Commission (NMC) bad bun na kine ki nonghikai ki dei kiba na Meghalaya.
 model ban pyniaid ia ka Tura Medical College bad ia kane ka jaka pule doktor yn pyniaid hi noh da ka Sorkar.){kind=link}