Shillong, Risaw 28 : Ka Dorbar Shnong Nongrah, East Khasi Hills, kaba la bna nam ha kine ki khyndiat bnai namar ka jingshah pyniap ki ar ngut ki heprit, kala kyntait ia ka jingkam u briew uba shah kynnoh kynshlein kynthei ba u dei u nongshong shnong ka shnong Nongrah Block II.
Ia une u briew u dei u Tamdorlang Risaw uba shah kem halor ka jingkynnoh kynshlein kynthei ha ka thain Laitumkhrah. La kem ia u na kawei ka shnong ha ka thain Mawsynram bad la kurup noh ruh ïa ka kali Bolero kaba u pyndonkam.
U Superintendent of Police ka East Khasi Hills,Bah Vivek Syiem, u iathuh ba ki pulit ka Laitumkhrah Police Station ha ka 15 tarik Risaw, 2025, ki la ïoh pdiang ia artylli ki ejahar na arngut ki briew, kiba la ujor ba ki la shah kren kynshleiñ bad shah buddien ha ki jaka paidbah ha uwei u briew ba ñiah ïa ka kali Bolero kaba don ïa u number ML05P 7884.
Ki Pulit kila register case ia kine ki ejahar bad kila kem ia une u briew myn ha ka 25 tarik Risaw.
Halor kane, U Rangbah Shnong ka Nongrah Bah DR Lyngrah bad u Secretary Shnong Bah P Pyngrope, kila kyntait war ia ka jingkam jong u Tamdorlang Risaw ba u dei u nongshong shnong ka shnong Nongrah, namar ba ka kyrteng jong jong u kam shym la don satia ha ka bui ba u la register ia lade kum uta u nong shong shnong ka shnong Nongrah.
U Bah P Pyngrope, u la iathuh ba katkum ka jingiathuh ki briew ba nangne nangtai la iathuh ba u Tomdor Risaw u dei trai shnong na Mawpen bad ka kam ba u trei ruh ka dei kum u Chairman jong ka Mawsynram Block bad ym tang katta u dei ruh u General Secretary ka UDP Youth Wing jong ka Mawsynram Block. Une u briew um shym la don kyrteng hapoh ka shnong Nongrah kumba u la kam ba u sah ha Nongrah Block II.
“Hadien ba la mih ha ki social media, ngi la wad iaka jingshisha hynrei kaba sngewsih ka long ba ki pulit kila shu ngeit beit ia ka statement jong uto u rangbah, hynrei kam don kano kano ka jingpynshisha n aka shnong namar ban pynshisha ia uno uno u nong shong shnong kadei ka kamram jong ki nongialam shnong. Ha ka jingshisha ki pulit kila dei ban wad bniah bha shwa ia ka tyllong bad ka jaka jong utei u briew” ong u Bah P Pyngrope.
U Bah Pyngrope u la ong, “Hadien ba u la pynpaw ia ka kyrteng jong ka shnong Nongrah, ngi la tohkit ia kiba haiing ha sem ba don jingiadei bad u, hynrei kaba phyla ka long ba la pyntip ba mynta la jan saw snem tam um ju wan mih shuh sha kane ka shnong bad kane kala nang pynsngewsih shuh shuh ia ngi kum ka shnong”.
Na ka liang u Rangbah Shnong u la pynrem jur ia kane ka jingkam nongshongshnong u Tomdor Risaw, namar ka kyrteng kam shym la don satia ha ka shnong bad wat kiba haiing jong u kiba sah ha kawei na ki Dong ha Nongrah, kila iathuh ba naduh ka por COVID 19 um ju wan mih shuh haduh mynta.
