Itanagar, Risaw 24: U Myntri Rangbah ka jylla Arunachal Pradesh u Pema Khandu u la pynlong ia ki jingialang kiba bun ha Tokyo ha ka sngi Palei da ka jingthmu ban pyniar ia ka jingiatreilang ha ka kolshor bad ka ioh ka kot hapdeng ka India bad ka Japan.
U Khandu, u don mynta ha ka jingleit jngoh ia ka ri Japan. U Myntri Rangbah ula ïakynduh ïa u Yasutoshi Nishimura uba dei u Dkhot ka Ïing Dorbar Thawaiñ ne Member of the House of Representatives, Japan, bad u ba dei ruh u Chairman jong ka Japan–India Parliamentary Friendship League.
U Khandu u la pynlong ruh ka jingialang bad u Hiroshi Tanimura, uba dei u Executive Director, ka Japan Association of Travel Agents (JATA).
U Khandu u la ïakren halor ki lad ki lynti ban kyntiew ïa ka jingïatreilang ha ka liang ka kam jngohkai pyrthei hapdeng ka Japan bad ka thaiñ Shatei Lammihngi jong ka Ri India, khamtam eh bad ka Arunachal Pradesh.
“Ngi la ia kren na ka bynta ban rah sha khmat ia ka jingiadei bad ka jingiatrei lang hapdeng ka India–Japan bad ruh ban ban pynkhlain ia ka jingiadei ha ka liang jong ka kolshor jong ngi bad ban wad ia ki lad ki lynti jong ka jingiatreilang ha ka roi ka par”, la ong u Khandu.
Ha kawei pat ka post, u Myntri Rangbah u la kdew ba u la don ka jingïalang bad u Toshiaki Nishikawa, Chairman & CEO jong ka ASEAN Group Co. Ltd bad ki associated companies.
“U (Nishikawa) u la pynpaw ïa ka jingangnud jong u ban kyntiew ïa ka jingdon jong ki nongtrei nong India ha Japan bad u la dep ban ïatreilang bad ki katto katne ki jylla jong ka ri India ban kyntiew ïa ki jingthmu ban pule ïa ka ktien Japan bad ban pynroi ïa ki sap.Ka long kaba ioh mynsiem shisha ban iohi ba kum kine ki jingpynkhlain ia ka jingiadei hapdeng ka India–Japan,” la thoh u Khandu.
Shuh shuh u Myntri Rangbah u la ïasam ruh ba u la don ka “jingïalang bam ja miet kaba sngewtynnad” bad ka Itsunori Onodera, ka Nongïalam jong ka Policy Research Council and the Tax System Research Council, Yoshiaki Wada, dkhot barim jong ka iing dorbar thaw ain bad u Rui Matsukawa, uba dei u Member jong ka House of Councillors.
Ha kine ki khyndiat sngi jong ka taiew, u Khandu u la leit jngoh ïa ka Sophia University ha Tokyo bad ïa ka Tokyo Rinkai Prevention Park, da kaba pynpaw ïa ki lad jingïatreilang ha ka higher education ne ka pule puthi kaba kham shalor, ka technology nalor kiwei pat.
Ha ki post bapher bapher hapoh ki rynsan social media, u la ong ba u la pynlong ïa ki jingïakren kiba don jingmut bad u President ka Sophia University u Prof. Miki Sugimura bad u Chancellor u Prof. Sali Augustine SJ, ha ka jingdon lang ki delegates napoh ka Indian Embassy ha Tokyo.
“La pynshlur ban tip ba ki skulbah jong ka Japan ki nang ai ïa ki jinghikai kiba pyndonkam da ka ktien phareng (English-medium courses) bad ba ka tnat pule puthi ha Japan ka plie lad na ka bynta ka jingïatreilang kaba kham khraw ha ka pyrthei,” la thoh u Khandu ha ka X.
