Shillong, Risaw 23: Lada phi long shisha ki briew kiba ieit bad ba sngewtynnad ban peitkai ia ka phutbol, to long kiba la pynkhreh, namar shen ka Shillong Sports Association kan pyn sdang noh ia kawei ka lympung ialehkai kaba thymmai-ka SSA Champions Cup, kaba la buh ban pynlong ha SSA Stadium, First Ground, Polo, naduh u bnai u ban wan.
Khyndiat shaphang kane ka lympung, ka jingiakhun kan long da baroh ki team, ne klob, kiba iakhun ha ki san tylli ki kyrdan ne ki division, kiba ka SSA ka pynlong ia ka man la ka samoi, kaba kynthup naduh ka Shillong Premier League, First, Second, Third bad ka Fourrth Division, ha kaba ki kynhun ne team kiba long ki lahduh bad kiba wan ba ar, kin pyndap ia ka prokram jong ka Champions Cup, kaban phiah ia ki ha ki ar bynta (group) ha kaba ki artylli ki team/lob ba ioh khur bun point kin jam pat sha ka semifinal.
Haba phai sha ka song khusnam pisa, ka kynhun ne klob kaba ioh ban rah ia ka nam lahduh kane ka lympung, kan ioh ba kan khung ia ka song pisa kaba long 8 lak tyngka, kaban long kawei na ki song khusnam pisa kaba heh ha ka jylla hi baroh kawei.
Kumba ka long ia mynta, ka SSA ka la lah ba kan pyndep saw tylli ki lympung ialehkai ba dei jong kane ka samoi, bad kaba sah ka long satang ka lympung iakhun jong ka First Division, ha kaba marsein kut kane ka lympung, ka SSA beit beit kan sdang ia ka SSA Champion Cup.
Ki kynhun ne klob kiba la pyntikna ban ioh iakhun ha kane ka Champion Cup ki long Langsning & Shillong Lajong from the Shillong Premier League, Mylliem Lum & Laitkyrhong na ka Second Division, Mawkriah West & Umlyngka na ka Third Division bad ka Mawkasiang & Mawlynrei na ka lympung U-20 Fourth Division.
Nalor katta, kum shi bynta ban plie lad lang ia ki kynhun ba kin ia biang tara bha ka kynhun ka long ki, ki kynhun ne klob kiba dei na ka lympung ialehkai jong ka Second, Third bad Fourth Division, la shah ia ki ba ki lah ban soi (on-loan) kumba 5 ngut ki player, kaba kren shai kdar ba long katba ka long, u paidbah hi un ioh ban peit bad ban sakhi ia ka jingiakhun kaba itynnad bad ba shyrkhei ha kane ka lympung.
Ka dawbah kaba pynlong ia ka SSA ban shim ia kum kane kawei ka sien jam ban pynlong sa kum kane ka lympung ka long ba kum ka synjuk kaba la rim bad ba la slem bha, kam hun kam suk ka mynsiem ban pynkut ia la ka samoi ialehkai ka jong ka, khlem da plie ne ailad ia ki kynhun ne klob ba lahduh bad ba wan ba-ar ban ioh ia ka kabu ban ia shut tyrpeng bad ki kynhun ne klob kiba tbit bd ba khlain na kiwei pat ki lympung (division), da kaba pynlong ia kum kane ka lymnpung, kan iarap ruh ia ka Meghalaya Football Association (MFA) ba kan wan ba kan sakhi bad khmih ruh ia u nongialehkai uba tbit bad ba kynsai, khnang ban plie lad ia u ban ioh mihkhmat wat ia ka jylla.
