Shillong, Risaw 22: U Nongialam ka National People’s Party (NPP) bad Myntri Sorkar Marcuise N Marak ula pynpaw ba ka jingslem ha kaban pyllait ia ka tulop sha ki nongtrei ka Garo Hills Autonomous District Council (GHADC) kan ym ktah satia ia ka NPP ha ka elekshon kaban wan.
Haba iakren bad ki nongthoh khubor hynne ka sngi Balang, u Marak ula ong ba ka seng ka dang pynbeit ia kane ka mat bad kiba bun ki nongtrei kila sngewkmen bad kila leit ban bteng ban treikam ha ophis.
“Ki lah sdang ban pynkhreh ia ki bill bad kiwei kiwei. Shisien ba la dep pynbiang ia ki bill, ia ka pisa yn sa siew sha ki (nongtrei)” ula pynthikna.
U Marak ula iengskhem halor ka jingkular ka seng ban iadon beit bad ki paidbah ha kano kano ka bynta kaba man la ka sngi. “Ngi don baroh 24 x 7 bad ki paidbah. Ngi lah long kiba la pynkhreh ban iakhun ia kano kano ka elekshon”.
Ha kaba iadei bad ka jingpynkhreh iaka elekshon GHADC, u Marak ula pynbna ba ka seng kala dep ban pynmih ia ka jingpynbna paidbah na ka bynta ki kyrtong kiba don jingthmu ban iakhun ia ka elekshon na ka seng bad ka Tarik kaba khatduh ban pdiang ia ki aplikeshon ki kyrtong kan kut ha ka 14 tarik u Naiwieng.
Ki kyndon jong ka seng ban jied ia ki kyrtong kan shong eh ha ka jinglah ka jongki ban jop ia ka elekshon, ha kaba kan don ruh ia ka jingai jingmut na ki nongialam ha ki shnong ki thaw kaban long ka bynta kaba kongsan bha.
“Ki kyndon ki jong ngi kan shong beit ha ka jinglah ban jop. Kan shong ha ki shnong ki thaw. Ngin sa pan ia ki jingpynshai na ki nongialam ka seng kiba don ha kylleng ki shnong ki thaw. Ngin sa shah shkor ia ki” ula ong.
U Marak ula bynrap ruh ba ka jingiai don beit ha ka seng kan long ruh ka mat kaban pdiang bha hynrei kaba donkam bha kadei halor ka jinglah ban jop.
Halor ka jingkylli, u Myntri ula ong “Nga dang ap ia ki kaiphod namar ba nga dang shu dep shong jingialang myn shisngi bad ki dkhot jongka Regional Committee bad nga lah bthah ia ki ba kin lum ia ka jingialang man la ka taiew ba kut bad kumta kin sa tip ki lah don katno ngut ki kyrtong kiba la pan tiket. Ngi lah ai ia ki phom sha baroh ki kyrtong kiba thmu iakhun ia ka elekshon”.
U Nongialam ka NPP ula pynpaw ia ka jingskhem jingmut ba ka seng kan ioh pdiang ia ki aplikeshon na bun ngut ki kyrtong kynthup ia ki longkmie bad ka seng kan sa ai phom ia broh ki kyrtong.
Ula kdew ruh ba mynta ka kyntiew la pynkiew noh ia ka bai aplikeshon sha ka T.5000 ia kaba yn sa ai da ki ophis treikam ha ki district.