Jowai, Risaw 22 : Ki Nongshongshnong ka Lapangap, West Jaintia Hills, ha ka sngi Balang, kila sdang biang ban leit sha ki lyngkha ban ot ia u kba uba la ih, kaba la wanjia hadien artaiew bala shu ieh hadien ka jingjia iaumsnam ba dang shen bad ki paid Karbi ba na ka shnong Tahpat, West Karbi Anglong, kaba lam sha ka jingiap jong uwei u briew.
Hashuwa ban iahiar sha ki lyngkha kba ha Pynthor Lapangap, ki nongshongshnong kila ialum paidbah ha madan ialehkai phutbol ka shnong ban ap ia kaei kaba mih na ka jingiakren iasuk bala pynlong ha Khanduli hapdeng ki Heh Sorkar bad ki Nongialam na baroh arliang kynthup ki nongmihkhmat ka West Jaintia Hills bad ka shnong Lapangap bad kiba na West Karbi Anglong bad ka shnong Tahpat.
Hadien kane ka jingialang, ki nongshongshnong, bala wan synran da ki para marjan na kiwei ki Shnong, kila iahiar sha lyngkha ha ka por 10:15 baje mynstep ban sdang ia ka jingia otkba.
Ki Nongialam na ka Synjuk ki Waheh Chnong ka Ri Jaintia bad ki Nongialam na ki kynhun Sengbhalang ba paw ka thain kynthup ka FKJGP, KSU bad JSU, kila synran ia ki nongshongshnong ka Lapangap ban pyni ia ka jingiadon ryngkat.
Ki bor pahara na Assam bad Meghalaya kila syrtap ha ka thain ban pynthikna ba ka jingotkba kan iaid beit iaid suk bad khlem kano kano ka jingjia.
