SPL 2025 | Rah ka Langsning ia ka nam lahduh da ka jingpyniakhaid ka Rangdajied ia ka Mawlai

Shillong, Risaw 20: Ka jingiakhun hapdeng ka Mawlai SC pyrshah ia ka Rangdajied United FC, ha ka jingialehkai kaba khatduh artad jong ka lympung ialehkai Shillong Premier League, ka Shillong Sports Association, ka la kut noh ha ka jingiakhaid kaba long da mar shi kol, bad kane ka la pynlong ia ka kynhun ialehkai ka Langsning Football Club, ba kan rah iaka nam lahduh jong kane ka lympung kaba long hadien 7 snem.

Kane ka nam lahduh ba ka Langsning FC kan ioh ba kan rah, ka la wan hadien ba ka la hap ba kan ap ia ka naduh ka 14 tarik mynta u bnai, kaba dei ka jingiakhun kaba khatduh artad ka jong ka ha kane ka samoi ialehkai kaba mynta, kaba la pynialehkai ia ka dang shi kylla (single leg), bad kane ka nam jop ka la wan hadien ba ka Shillong Lajong FC ka la lah shwa ba kan iakhaid da 0-0 bad ka Nangkiew Irat SC,  bad hynne pat ka janmiet, ka kynhun ialehkai ka Mawlai SC, kam shim la lah ba kan pynliem ia ka Rangdajied.

Ha ka jingshisha, ka long kaba eh bha ia ka kynhun ialehkai ka Langsning FC ban hap ban shu ap, pynban ha kaba kut ka Langsning FC, kaba la ioh ba kan khur pura 20 point, ka la biang pura ia ka ban rah ia ka nam kum ka lahduh, bud pat sa ka Shillong Lajong FC kaba la khur 19 point, ka wan ban bat ia ka kyrdan kaba ar, katba ka Mawlai, kaba la ioh ba kan khur lem 19 point, ka bat ia ka kyrdan kaba lai.

Ka sien ba khatduh ia ka kynhun ialehkai ka Langsning FC ban rah ia ka nam lahduh jong ka SL ka dei ha ka samoi ialehkai 2017 bad 2018.

Haba phai sha ka jingiakhun kaba la long hynne ka janmiet, dei ka Mawlai kaba la lah ban tam shakhmat da shi kol kaba la wan lyngba u Ricky Chyne ha ka mini tba 50, hynrei ha ka minit kaba 58, ka Rangdajied United FC, ka la ioh ba kan pynphai kylla ia kane ka shi kol lyngba u Pasborlang Khonglikong, na ka jingiakhun kaba u sawar jong ka nam ialehkai bha u la iai padai sha baroh kine ki ar kynhun, hynrei ha kaba kut, ka nam iakhaid ka pynlong ia ka Mawlai SC, ba sa shisien kan duh ia la ka kabu ksiar ban ioh ban rah ia ka nam kum ka lahduh, katba ka kynhun ialehkai ka Rangdajied United FC kan pyntikna ialade ba kan neh ha ka kyrdan kaba san.

Kumta ha kaba kut jong kane ka samoi ialehkai, ki 6 tylli ki kynhun/klob kiba don haka kyrdan ka Top 6 ki long ka Langsning, Lajong, Mawlai, Nangkiew Irat, Rangdajied bad Sawmer, kaba pynlong ia ki ba kin buh jaka pat ialade sa ha kawei pat ka lympung iakhun ka Shillong Super Cup, ha kaba ka Lansgning kum ka lahduh bad ka Shillong Lajong kaba wan ba-ar ki la buh jaka  lypa ialade ha ka semifinal, katba ki saw tylli kiwei pat ki team/klob kin khreh ba kin iakhun ia ka play-off, ha kaba ia ki prokram ki jong ka, yn sa pynbna pat ia ka kham hadien da ka SSA.