Agartala, Nailur 14 : U President ka Tripura Pradesh Youth Congress u Rakhu Das ula ngat ha ka jingshah thombor ha ka por ba ula leit ban iashim bynta ha ka jingialang ha ki bynta jong ka Bishramganj kaba hap hapoh Sepahijala district hynnin ka jan miet sngi ba Ar.
Haba kren sha ka lad pathai khubor, u Das ula kynnoh da kaba ong; “Ka kynhun ki runar ba la kyrshan da ka BJP kila kerkut ia ka jaka pynlong jingialang ha Bishramganja. Ngi la wan sha kane ka jaka hadien ka jingpynlong ia ka jingiakhih pyrshah da ka jingiaid paidbah.Ka heh nongialam na Delhi ka Moumita Kali ruh kala ngat ha ka jingmynsaw ha kane ka jingshah thombor.”
Nalor kata ula ong ruh kiba bun tylli ki kali kaba kynthup ia ka kali ka jong u kila shah pynjulor ha ki nongtrei bad ki kynhun runar ka BJP kiba la thombor naphang ha katei ka jaka pynlong jingialang.
U Das ula kynnoh ruh ba wat hadien ka jingiai pyrshang, hynrei na ka liang ki bor pulit kim shym la shim khia ban aijingiarap bad ban pyllait ia kine ki nongtrei ka seng Congress kiba la sahkut hapoh katei ka iing ba pynlong jingialang.
Ki tyllong khubor ki iathuh ba kane ka jingiakynad kala khia hapdeng ki nongkyrshang ka Congress bad ka BJP hadien ka rally jingiakhih pyrshah ba la khot pynlong da ka party Congress.
Kham hadien la phah ia shibun bah ki bor pulit bad ki kynhun pahara TSR ha ka jaka iew kaba don marjan khnang ban tem ia kane ka jingiakynad.
Na ka liang u president ka Youth Congress ruh ula poi sha ka jingiania kaba jur bad u SDPO ka Bishalgarh, u Rahul Das da kaba kynnoh ba ym shym la shim kano kano ka sienjam pyrshah ia kine ki kynhun runar ba la kyrshan da ka seng BJP.
