Shillong, Risaw 15 : Ka Sorkar Jylla kala bthah ia ka Tnad Pule Puthi ba kan wanrah ia ka action plan ne ki lynti ban shim, na ka bynta ban pyntreikam ia ki jingai jingmut jong ka Meghalaya State Education Commission (MSEC).
Haba pyntip ia kane hadien ba pyniaid ia ka jingialang jong ka Kynhun Myntri ha ka sngi Balang, u Myntri Rangbah ka Jylla Conrad K Sangma ula ong ba ia ka kaiphod jong ka MSEC la wanrah hapoh ka jingialang ka Kynhun Myntri ban iatai sani ia ka.
“Ia ka kaiphod ka MSEC la pdiang da ka Kynhun Myntri. Kumta, la bthah ia ka Tnad Pule Puthi ba kan pule bniah ia kawei pa kawei ka jingai jingmut bad ban wanrah ia ka plan ba lah ban pyntreikam bad ka lynti ban iaid shakhmat” ula ong haba iakren bad ki nongthoh khubor.
“(Hadien kane), ka Kynhun Myntri kan sa rai pat ba kumno ngin jam shakhmat ha ka jingpyntreikam ia kane ka kaiphod bad ki jingai jingmut bala ai da kane ka Commission” bynrap u Conrad.
Ka Meghalaya State Education Commission ka dei kaba la thaw da ka Sorkar ba kan ai jingmut ia ki lynti ban wanrah jingkylla ha ka kam pule dangle kaba iaid kat kum ka National Education Policy (NEP), 2020.
Ka kaiphod MSEC bala aiti dang shen, ka batai ia ki jingai jingmut halor ki bynta kiba kongsan kum ka jingpyniasoh ia ki skul, wanrah jingkylla ha ka pule dangle jong ki kyrdan ba shalor, ka jingai jinghikai pyntbit ia ki nonghikai, ka jingleh bha ki khynnah pule bad kiwei kiwei.
.){kind=link}