Shillong, Risaw 10: Ka BJP-Meghalaya, kala pynrem jur halor ka jingshah pyniap u Khynnah 7 snem Kyrshanbor Kharmudai bad dawa ban kem kloi ia ki briew ba donkti ha kane ka kam pyntriem.
Ha ka kyrwoh, u Nongaiktien ka BJP Bah Mariahom Kharkrang ula ong ba kane ka jingjia kala pynkyndit ia baroh ki nong shongshnong ka Jylla Meghalaya kynthup ia ka party.
“Hapdeng ka jingsah lyngngoh ia kane ka kam pyntriem ba shyrkhei, ka BJP-Meghalaya ka pyrem jur ia kane ka kam bymman bad phah ia ka jingsngewlem sha ki bahaiing hasem kaba la mad ia kane ka jingduh” ula ong haba bynrap “Ka party ka duwai ba ki nongleh bymman kin shah kem kloi bad ka ain kan pynioh kloi ia ka jingbishar ba hok”.
Ka BJP ka kyntu ruh ia ki paidbah ba lada don mano mano kiba don jingtip, kaba lah ban iarap ha kaban iohkem ia kiba don kti, ba kin wan shakhmat ban ai jingtip sha ki Pulit.
“To ngi iawan lang bad iarap ia ki briew ka ain, ban pynthikna ba kum kine ki kam kin ym jia shuh hadien habud” bynrap u Bah Kharkrang.
