Shillong, Risaw 08 : U Myntri Rangbah ka Jylla Conrad K Sangma, ha ka sngi Balang, ula pynbna ia ka rai jong ka Sorkar Jylla ban buh noh ia ki detox centre ne ka jaka ban sumar ia kiba kyrni dih droks, ha baroh ki District ka Jylla haba bthah ia ka Tnad Pulit ban kyndang ia baroh ki ktem khaii droks, da ka jingthmu ban pynlong ia ka Meghalaya kaba lait na u droks.
Ia kane ka rai la shim ha ka jingialang bishar kam jong ka Drug Reduction, Elimination & Action Mission (DREAM), kaba la wan iashimbynta da ki Heh Ophisar na ki Tnad bapher bapher, ki kynhun ba don bynta bad ki Seng Niam.
Haba kren sha ki lad pathai khubor, u Conrad ula pyntip ba ula bthah ia ka Tnad ka Koit ka Khiah bad ka tnad Social Welfare, ba kin buh ia ki jingtei na ka bynta ka detox bad de-addiction centre ha man ki district headquarter ka Jylla.
“Ngi kyrmen ba ha kine ki lai-saw bnai ban wan, ngin lah ban buh ia ki detox bad de-addiction centre, kiba treikam pura ha manla ki district headquarter” ula ong.
U Conrad ula ong ba kine ki cente ki lah ban don ha ki hospital ka Sorkar, ki hospital shimet, lane ki jaka jong ki kynhun trei mon sngewbha kiba kwah ban iatreilang bad ka Sorkarhaba bynrap ba ka jingialang kala iakren ruh halor ka jingthaw ia ka Standard Operating Procedure (SOP) na ka bynta ban pyniaid ia kine ki centre bad ka bynta jong ki shnong ki thaw ban iashimbynta lang ha kane ka kam.
Ula kular ba ka Sorkar kan pynthikna ba ki nongtrei kin dei kiba la ioh jinghikai pyntbit ha kaban pyniaid bha ia kine ki centre.
U Myntri Rangbah ula pyntip ruh ba la bthah ia ka Tnad Pulit ba kan kynrang ia ki ktem khaii droks bad ki jaka kaba la die beain ia u droks. Ki Pulit kin pynjur ia ka jingleit talasi ba kyndit kyndit bad yn sa pyndait ruh iaki kor CCTV ha kine ki jaka ba jur ka kam khaii droks ban ioh peit thuh ia ka jinglong jingman.
“Kumta, ngi la shim ia ka rai bad ki Pulit kin pynlong ia ka jingtalasi ba kyndit kyndit manla ka por bad kane kan dei ha ka tyngeh bha bad la bthah ruh ia ki Pulit ba kim dei ban aili ban pynthikna ba kine ki kam kin sdang noh. Lehse ngi lah ban nym lah ban leit ha manla ki jaka ha ka shisien leit hynrei ngin sdang shuwa na ki jaka ba jur eh ia kaba ngi sngew ba ka long kaba donkam ia ki Pulit ban leh eiei da kaba tyngeh” ula ong.
“Nalor ka jingshisha ba ki Pulit kila lah ban tem ia ki briew ba khaii hynrei ia ki nongdie khutia kiba iaid ban die ia u droks ha kaba ki samla jong ngi kila shah ktah, ngi lah ban leit shaduh kane ka kyrdan bad ngi kwah ban pynthikna ba ki Pulit kin leh da kaba tyngeh bad ngin sa pyndait ia ki kor CCTV ha kine ki jaka, ngin pynbun ia ki briew ban peitngor, jingtalasi ba kyndit kyndit da ki Pulit, Exciae bad ruh ki Shnong ki thaw. Kin sa iatreilang banpynthikna ba kin leh ia kaba donkam ha kine ki jaka” bynrap u Conrad.
U Conrad ula ban jur ba ka Sorkar kala shimhia bha ha ka jingiakhun pyrshah ia u droks bad kan shim ia ka lynti kaba tyngeh pyrshah ia kito kiba donkti ban die bad pynphriang ia u droks.
“Nga kwah ban phah ia ka khubor sha ki paidbah ba ka Sorkar kala shimkhia bha halor kane bad phin sa iohi ia ki kam kiba tyngeh ha ki sngi ban nang wan bad kumba nga ong, la ka dei na ka Tnad Pulit, ka Tnad ka Koit ka Khiah ne ka Tnad Social Welfare ne ki shnong ki thaw, ngin baroh ngin iatreilang ban pynthikna ba ngi dei ban leh ban tehlakam bad ruh ban lah leh eiei pyrshah ia ki kam khaii droks hapoh ka Jylla” ula ong.
Haba kylli halor ka jinglong jingman ba mynta jong ki Rehabilitation Centre, u Myntri Rangbah ula ong ba bun na ki District Headquarter kim don satia ia ki jingdonkam, ta ka daw ka Sorkar kala rai ban buh noh ia kawei ka detox bad de-addiction centre ha man ki district.
Ula pyntip ba ka Sorkar kan sa shong bishar ia ka jingbuh kyndon ia ka dor ka mur bai phah sumar jong kine ki centre khnang ban pynthikna ba baroh kiba donkam jingsumar kin ioh ia ki jingsumar.
Ula pynpaw ba ka Sorkar kan ym sangeh satia ia kane ka kam tad haduh ba ka Jylla kala lait syndon na u droks bad baroh ki nongdih droks kila ioh jingsumar bad lait na u kynjri jong une u jingdih.
