Ioh jingsneng ki paidbah na ka VPP | Khyrwait da ka khajna wat ki dukan sha/ kwai dong

Phah notice ka KHADC ban siew professional tax

Shillong, Risaw 08: Hadien ka jingpynjop kput ha ka elekshon MDC 2025, ka Voice of the People Party (VPP) kaba bat ia u lakam ban synshar ha Khasi Hills Autonomous District Council (KHADC), kala khyrwait kylla mynta ia u paidbah ba trei ia ki kam khaii pateng, da ka hukum ba ki dei ban siew noh ia ka khajna Professional Tax.

Ha kane ka hukum, wat ki dukan sha, dukan ja, ki dukan die marbam, dukan die mar barit baria, die kwai dong, kim shym la lait ne shah map shuh khlem da pyniapher shuh la phi dei ki Khasi ne ki bar Jylla.

Kane kan dei ka sien ba nyngkong ba ka KHADC kan hukum siew khajna Professional Tax ia ki dukan ki paid Khasi ha man ki jaka/ ki Shnong ki thaw.

Ki Executive Commitee jong ki snem ba lah leit, ki lum ia ka khajna Professional Tax na ki briew ba trei ia ki kam khaii kynthup ki Contractor, ki supplier bad kiwei kiwei hynrei ym ia ki nongshong dukan barit baria- dukan sha, ja, die kwai dong, dukan die marbam.

Kat kum ki notice bala phah da u Superintendent (Professional Tax) ka KHADC, sha ki dukan sha, dukan marbam ha Mawlai Mawiong, kaba la ioh kopi da ka Shlem, la ong ba haba pyntreikam ia ka notification ka Sorkar No ERTS (T) 106/79/408 ba 1 tarik Naitung, 1996, bad kat kum ka kyndon 3 jong ka Meghalaya Profession, Trades,Calling and Employment taxation act, lah bthah ba kino kino ki briew kiba trei kam khaii pateng kin hap siew ia ka khajna manla u Snem.

Ka ong ruh ba kat kum ka kyndon 7 jong kane ka ain, lah bthah ia ki nongshong dukan ba kin ai jingtip ia ka jingioh kamai ha ka shisnem lynba ka form ha ryngkat ki kot ki sla ban pynsakhi.

Kat kum kane ka notice, u Superintendent ula bthah ia ki dukan ba ioh pdiang ia ka notice ba kin ai noh ia ki jingtip halor ka jingioh kamai jong ki ba shisnem sha ka Ophis jong u, hapoh ka 15 sngi lem kumta ka Ophis kan leh eiei pyrshah ia kibym bud ryntih kat kum ki kyndon jong ka ain.