Guwahati, Risaw 5: Ka sorkar jong ka jylla Assam kala shim ia ka sienjam ba kongsan ban pynduna ia ka jingshlei um man ka por, da kaba ithuh ia 15 tylli ki jaka hapoh ka jylla na ka bynta ban shna ia ki wetland reservoir ne ki jaka pyllang um ban pyllang ia ka um ba tuid palat pud na ka Wah Brahmaputra bad ki wah duid na ka.
Ki jaka ba la dep ban pynbeit ha ka bynta ba nyngkong ki kynthup ia saw tylli ha Jorhat bad Golaghat, bad kawei ha Sonitpur, Sivasagar, Dibrugarh, Majuli, Morigaon, Tinsukia, bad Kamrup (Rural) District.
U Myntri sorkar ba peit ia ka tnad Water Resources u Pijush Hazarika ha ka sngi Saitjain u la ong ba ia ka tender la dep ban khot bad ka kam la sdang na Mora Bhorolu kaba don ha Sonitpur, ha kaba la mang pisa haduh ₹61.14 klur ban pyniaid ia ka um na ka Wah Brahmaputra sha ki jaka ba lang um.
“Ha kaba sdang la shah kynthoh jur ia katei ka jingmut, hynrei mynta ka sngi ka la ioh ia ka jingmynjur na ka high level”, la ong u Hazarika ha ki nongthoh khubor. “Haba u myntri kam pohïing ka sorkar pdeng u Amit Shah u la pynbna ïa ka jingmut ban thaw ïa ki jaka pynlang um ban pynïaid ïa ki um jong ka wah Brahmaputra, ka la don ka jingartatien. Hynrei mynta, da ka jingbit na ka Ministry of Home Affairs lai bnai mynshwa, ka jingtrei ha baroh 15 tylli ki jaka kan sdang hapoh shibnai.”
Haba batai halor kane ka projek, u Hazarika u la ong, “Ïa kine ki jaka lang um ha ki jaka shyiap yn tih, yn shna ïa ki kynroh, bad yn buh ruh da ka sluice gates ka ban iasoh bad ka wah.Ka Mora Bhorolu wetland kan iarap ym tang na ka jingshlei um hynrei kan kyrshan ruh ha kaba iadei bad ka kam ri dohkha bad ha ka rep ka riang.”
Nalor ka projek wetland, ka Assam ka dang pynskhem ruh ia ki kynroh jong ka da kaba pyndonkam ia ki kor ki bor kiba mynta. Naduh u snem 1950, ka jylla ka la shna haduh 4,500 km ki jingker um, ha kaba la pyndap sa 900 km tang ha kine ki san snem ba la dep.
Ka jingthmu ban buh ha ki wetland reservoir ha ki jaka long shyiap, kaba la mynjur da ka Ministry of Home Affairs kaba la mang haduh ₹692 klur na ka bynta ka wad ba nyngkong bad ka jingthmu ka long ban pynduna ïa ka jingshah pynjulor na ka jingshlei um, katba ka dang pynmih ïa ki jingmyntoi ha ka liang ka mariang bad ka ioh ka kot na ka bynta ki nongshong shnong.
