Mano kata ka Tanushka Chakravarty? Mano kata ka Diya Ghosh? | Buh jingkylli ka kSU ba ioh bhah pule MBBS ka Jylla

Shillong Risaw 02: Ka Khasi Students Union (KSU) kala pynpaw ia ka jingbitar pyrshah ia ka sorkar jylla halor ka jingpynrung ia kawei ka samla ka bym dei riewlum ha ka ‘Unreserved Category’ ban leit pule MBBS na ka bhah ka jylla.

U General Secretary ka KSU samla Donald V Thabah ula buh jingkylli da kaba ong, mano ka Tanushka Chakravarty? Mano ka Diya Ghosh? Kidei kiei ba ka sorkar kala mang kyrpang na ka bhah pule MBBS ka jylla wat haba dang don ki samla Khasi kiba kham heh marks shuh shuh.

Ula ong, ka KSU kala ioh jingtip ba ka Diya Ghosh kaba ioh NEET Score 472 bad ka Tanushka Chakravarty ka ioh NEET Score tang 442, kila ioh ban leit pule MBBS shabar ka jylla lyngba ka State Quota lyngba ka Unreserved Category.

U nongialam ka KSU ula pynshai ba ka Unreserved Category kam dei kaba la mang kyrpang tang ia ki bar jylla hynrei ia baroh ki nong Meghalaya kynthup ia ki Khasi-Jaintia bad Garo bad ka jingrung ha ka Unreserved Category kadei beit lyngba ka jingwan shakhmat ym na ka jaidbynriew.

Ula pynpaw ba haba peit pat katkum ka thup ba la pynlait da ka sorkar la shem ba ka don ka jingleh shiliang kaba palat ia ki samla pule Khasi kiba thrang ban pule MBBS bad shem ba bun ki Khasi kiba kham heh ka NEET Score ban ia kitei ki ar ngut ki bym dei riewlum, kaba mut ba ki dang don hok shibun ngut ki samla pule Khasi ban rung ha ka Unreserved Category ban ia kine ki bym dei riewlum.

“I don iwei i samla Khasi iba kham heh score ban ia ka Diya Ghosh bad ki don haduh hynniew ngut ki Khasi kiba kham heh score ban ia ka Tanushka Chakravarty. Kane ka kdew ba i samla pule Khasi iba ioh nyngkong ha ka Khasi-Jaintia Category i dei ban don ha ka serial number 13 jong ka Unreserved Category katba ka Diya Ghosh kadei ban don ha ka serial number 14. Kaba mut lada iwei i Khasi iba dei hok ban ioh rung ha ka Unreserved Category in ioh ban rung ha kane ka Category ka mut sa iwei i Khasi iba na ka Waiting List jong ka Khasi-Jaintia Category in ioh rung ha ka Khasi-Jaintia Category. Pynban ka sorkar Meghalaya kala pynkheiñ ia ki kyndon da kaba pynrung be-aiñ ia ka Tanushka kaba pynduh lad bad pynduh ia ka hok jong iwei pat i samla pule Khasi” la ong u General Secretary ka KSU ha ka kyrwoh khubor hynne ka sngi Palei.

Nalor kane, ula buh jingkylli la kane kadei ka jingbakla ba shida ka sorkar ne ka dei ka jingbym biang ki ophisar ka tnad ka koit ka khiah ne kadei ka jingleh khnang ban pynhun ia ki bahaiing jong ka Tanushka kiba lah ban don ka jingiadei kaba jan bad ki heh sorkar.

Ula ong, ka KSU kam lah ban pdiang da lei lei ruh em ia kane ka jingleh shiliang bad jingleh be-ain ka sorkar ia ka hok ki samla pule Khasi bad ka seng ka shim ba kane ka dei ka jingiuh roit ia ka hok ki samla pule Khasi bad kum kane ka jingleh ka sorkar ka pyning khong ia ka mynsiem jongki dkhot ka KSU.

U nongialam ka KSU ula dawa ba ka sorkar ka dei ban weng mardor ia ka Tanuhska bad thep mardor da ki samla pule Khasi kiba dei hok bad kane kam dei ka sien kaba nyngkong ba ka sorkar ka leh donbor ia ka hok ki samla pule Khasi, ka la jia teng ha u snem 2020 ha ka tnad Agriculture ruh ha kaba ka KSU ka hap ban tuklar ban pynioh ia ka hok ki samla pule Khasi.

Ka KSU kala maham ba lada ka sorkar kam weng mardor ia ka Tanuhska, kumta kan hap ban mih madan ban pynbor ia ka sorkar ban ai ia ka hok ki samla pule Khasi.