Shillong, Risaw 01 : Ka Non-Teaching Staff Association of North-Eastern Hill University (NEHUNSA) kala phah tuklar ha u Myntri ka Sorkar Pdeng ba khmih ia ka Pule Puthi Dharmendra Pradhan halor ka jingpynslem ba khlem nongrim ha ka ban pynlong man ka por ia ka jingialang Executive Council jong ka University.
Ha ka shithi sha u Pradhan, ka NEHUNSA kala ong ba ka Executive Council ka dei ka borkhmih kaba heh duh bad kaba pyniaid ia ki kam jong ka University, bad ka jingialang jong ka, ka long kaba donkam bha ha kaban pynbeit ia ki mat pule puthi bad ki jingpyniaid kam, kynthup ka jingthungkam ia ki nongtrei (non-teaching employees).
Ka ong ba ka jingpynslem ban pynlong ia ka jingialang kala pyndkoh ia ka jingkiew ka University, namar ka jingbym lah ban pyntreikam ia ki rai khlem ka jingmynjur jong ka Council.
Ka Association kala pynrem ruh ia u Vice Chancellor Prof PS Shukla halor ka jingpynslem ban wan treikam ha Ophis, kaba la iaid mynta la jan shisnem.
Kat kum ka NEHU Statutes, ka Pro Vice-Chancellor ba rangbah duh ka dei ban trei ia ki kam jong u Vice Chancellor haba um don ne wan trei.
Ka NEHUNSA kala kyntu ia ka Pro Vice-Chancellor ba rangbah duh ba kan pyniaid ia ka jingialang jong ka Executive Council namar ka jingbym don u Prof Shukla. Ka Association kala kdew ia ka NEHU Statutes bad ka shithi na ka Ministry of Education, kaba ong ba baroh ki jingialang ka University, kynthup ka Executive Council, dei ban pynlong hapoh ka Campus jong ka University. Kala pynpaw ba u Prof Shukla um lah satia ban pynlong ia kino kino ki jingialang kynthup ia ka Executive Council namar ka jingjah trei jong u kaba dang iai bteng.
Ha kajuh ka por, ka NEHUNSA kala pyntip ruh sha ki Nongialam ba paw ka ri kynthup ia u Rahul Gandhi, Nongialam ka Liang Pyrshah ha Lok Sabha, Dr Ricky AJ Syngkon, MP ka Shillong Constituency bad Saleng A Sangma, MP ka Tura Constituency halor kane ka kam bad kyrpad ruh ia ki ba kin tuklar lang.
