Shillong, Nailur 30 : U Myntri Rangbah ka Jylla Conrad K Sangma ha ka sngi Ba-ar, ula ai khublei ia u Chief Secretary Bah DP Wahlang, uba la shongthait noh na ka kam hadien ka jingaiti ban shakri haduh 32 snem ia ka Jylla Meghalaya.
Ha ka jingialang ka Kynhun Myntri hynne, u Conrad ula pynpaw ia ka jingsngewnguh kaba khraw ia u Bah Wahlang halor ka jingai jingshakri naduh ka mynsiem ia ka Jylla.
U Conrad ula iaroh ia ki synniang jong u Bah Wahlang sha ka Jylla, haba kubur ia ki jingpyrshang ba khlem thait bad ka jingaiti lut ialade ha ka jingshakri ia u paidbah.
Na ka bynta ka Kynhun Myntri, ka Sorkar, ki Nongtrei bad ki paidbah ka Meghalaya, u Myntri Rangbah ula pynpaw ia ka jingsngewnguh naduh ka mynsiem ia u Bah Wahlang namar ka jinglen lade ha ka jingshakri.
“U Bah Wahlang un shongthait noh mynta ka sngi bad ula ai 32 snem ka jingshakri ia ka Jylla bad ia ki paidbah bad mynta kan dei ka jingialang Kynhun Myntri ba khatduh eh jong u bad nga kwah ban buh ha ka jingthoh ia ka jingiaroh bad jing sngewnguh ia u (namar ka jingshakri ba ula ai ia ka Jylla Meghalaya” ong u Conrad.
