Shillong, Nailur 30 : U Myntri Rangbah ka Jylla Conrad K Sangma ula ong ba ka Sorkar Jylla kala buh hakhmat bha ia ka jingioh mihkhmat ki Kynthei ha ka Kynhun Myntri ha ka shiteng samoi ba sdang jong ka Sorkar bad mynta kan hap ban phaikhmat sa sha ki jingangnud jong ki thain (regional aspiration).
Haba kren sha ki lad pathai khubor ha ka sngi Ba-ar, u Conrad ula batai ka jingthaw ia ka Kynhun Myntri ka donkam ban pynbiang tarajur ia kiba bun kiei kiei, kynthup ka jingioh nongmihkhmat na ki thain bad ka jingpynkupbor ia ki Kynthei.
“Jin lada ngi don 20 tylli ki shuki Myntri ha ka Kynhun, hooid, nga long laitluid bad lah ban ai jaka ia baroh kiei kiei hynrei mynta u don da u pud. Ngi hap ban pynbiang tarajur ia ki jingangnud bapher bapher, kiba long kongsan kumjuh. Ka jing mihkhmat ki Kynthei ka long kongsan ia ngi, bad dei namar kata ba ha ka shiteng samoi ba sdang jong ka Kynhun Myntri, ngi la pynthikna ba ngi ai jaka lem ia ki Kynthei” ula ong.
Haba jubab ia ka jingkylli halor ka jingia sam kam ha ka Kynhun Myntri, u Conrad ula ong ba ka jinglong ka sain hima sima bad ka jinglong jingman ha ka por ba thaw ia ka kynhun synrap ki iapher bha. Ula bna jur ba ka kam Myntri Rangbah ka dei kaba jied da ki MLA jong ka Kynhun synrop ba synshar lane ka Party, bad kane ka dei ka dei kaba shim rai da ki Nong mihkhmat ba jied da u paidbah.
“Ka kam Myntri Rangbah ka dei kaba la jied da ki MLA jong ka Liang Synshar jong ka party ba ioh synhar bad kane ka dei ka lynti ba ngi jam shakhmat da ka jingjied ia u nongialam jong ka Sorkar MDA ha katei ka por. Ka dei kaba la mynjur lang, ka dei ka rai bala shim da ki Nongmihkhmat bala jied da u paidbah ba kane ka dei ka lynti synshar paidbah ba ngi iaid” ula ong.
Halor ki jingkynthoh ba dang shen jong ka Kong Ampareen Lyngdoh, kawei na ki 8 ngut ki Myntri ba shah weng noh ha ka jingbujli Myntri, u Conrad ula pynsahi ba ia ka shithi la phah sha baroh ki Myntri ba shah weng kam, kynthup ia ki Myntri n aka NPP, ha ka 12 tarik Nailur, kaba batai shai bha ruh ia ka jingbujli Myntri. U pynthikna ba baroh ki Myntri kila ioh pdiang ia ka shithi bad ki tip ruh ia kiei ki lynti bala shim.
“Kumta, ka jingkylli ba khlem kren lane pyntip kam mih satia. Ha ka shithi, ka dei kaba kham biang namar baroh ki jingbatai ba bniah la pynpaw. Nga khlem ai ia ka shithi sha ki Lad pathai khubor bad lada donkam, ngi lah ban ai ia kane ka shithi ruh hynrei ngi lah phah ia ka shithi bad baroh kila ioh pdiang ia ka” ula ong.
.){kind=link}