Shillong, Nailur 29 : U Commissioner & Secretary ka Tnad Education Vijay Kumar Mantri ha ka sngi Nyngkong, ula iakynduh ia ki nonghikai adhoc ba iakhih hapoh ka lama jong ka Federation of Adhoc School Teachers of Meghalaya (FASTOM), kiba la iashong kyllain mungor khlem pud mynta ka 192 kynta.
Kila rai ba kin pynbteng beit ia ki jingiakhih tad haduh ba ka Sorkar kala mynjur ban pyntreikam noh ia ki jingdawa jong ki, kata ban kyntiew kyrdan ia ki skul adhoc sha ki deficit.
“U (Mantri)la kular (ia ngi) ba un pule bniah bha ia ki jingdawa jong ka Federation” ong u Publicity Secretary ka FASTOM Bah EG War.
Kane ka rai ban pynbteng ia ka jingiakhih ka dei kaba la shim hadien ba ka kynhun jong ka Federation kala pynpaw ia ka jingbym sngewhun halor ka jingialang ba dang shen bad u Myntri ka tnad Pule Puthi Bah Lahkmen Rymbui, uba la pynpaw ba ka Sorkar kan sa shong bishar bha ia ka jingdawa kynthup ia ki jingai jingmut ba iadei bad ka jingpynbeit ryntih ia ka jingbun kyrdan jong ki skul hapoh ka Jylla shuwa ban shim ia ka rai.
Kat kum ka jingong u Vice President ka FASTOM Bah S Jungai, ka jingtyrwa ban pyntreikam ia ka Meghalaya Education Grant (MEG) ka dei kaba dang pynkhreh bad ki nonghikai adhoc kim pat sngew thikna halor ka jingpyntreikam ia ka.
“Kum ki nonghikai adhoc, ngim tip shisha la kin pyntreikam ne em ia ka MEG. Kumta, ngi ieng skhem ha ki jingdawa jong ngi, kata ban kyntiew kyrdan ia ki skul adhoc sha ki deficit lane ka deficit pattern” ula ong.
Ki nonghikai ba iakhih kila pynpaw ia ka jingbitar halor ka jingbym ai jubab jong ka Sorkar watla ka Federation kala dep phah haduh hynrew tylli ki shithi pynkynmaw sha ka Ophis u Myntri Rangbah.
“Ngin iai bgteng beit tad haduh ba u Myntri Rangbah u ai jubab ia ki jingdawa jong ngi” kila ong.
, kiba la iashong kyllain mungor khlem pud mynta ka 192 kynta.){kind=link}