Shillong Nailur 29: U Symbud Myntri Rangbah ka Jylla Bah Prestone Tynsong ula kren shai kdar ba ka Sorkar Jylla ka ieng skhem ha ka rai bad ka nongrim ba kan ym shah satia ban tih ia u Uranium ha Jylla Meghalaya.
Dang ha ka 8 tarik u Nailur, ka Ministry of Environment, Forest and Climate Change jong ka Sorkar Pdeng kala pynmih ia ka Office Memorandum (OM) ba pynpaw ia ka jingbym donkam shuh ban pynlong ia ka jingpynsngew paidbah ne ka Public Hearing lada donkam ban tih ïa ki marpoh khyndew ‘Atomic Minerals’ kaba kynthup ia u Uranium.
Kiba bun ki kynhun Sengbhalang bad seng sain pyrthe ka Jylla kila pynpaw ia ka jingpyrshah kaba jur ia kane ka Office Memorandum bad ong ba kane ka OM ka dei kaba la pynmih da ka jingthmu ban tih uranium da ka bor ha Jylla Meghalaya.
U Bah Prestone ula ong “Ki paidbah kim dei ban sheptieng ia katei ka Office Memorandum, namar ka sorkar jylla da lei lei ruh kan ym shah ban tih ia u Uranium uba don hapoh ka jylla Meghalaya”.
“Ki jaka ki jong ngi ki hap hapoh ka Sixth Schedule bad ka khyndew ka shyiap ka dei ka jong ka District Council, jong ki riewshimet, ka Kur, ne u Syiem ne jong ka Raid bad khlem da ioh jingbit na ki trai jaka ne ka District Council ka bym lah long ba ngin ai ia kata ka ‘Permission’ ba kin tih ia kine ki marpoh khyndew” ula ong.
Ula ong ba ka jinglong trai ki paidbah ia ki jaka ha jylla Meghalaya ka dei kaba la pynskhem ruh da ka iingbishar kaba hakhlieh duh jong ka ri ka Supreme Court ha u snem 2019 .
“Ka Sorkar Jylla kan ym shah lano lano ruh ba kan treikam katei ka Office Memorandum kaba la pynmih da ka Ministry of Forest” ong u Bah Prestone haba bynrap “Ka mat ban tih Uranium ka dei kaba la khylliap hangne namar ba ki trai jaka horkit hordang kim kwah ban ai jaka bad ka District Council ruh kam kwah ban ai ….ka Sorkar Jylla ruh ka mynjur lang bad ki ban ym ailad ban tih ia u Uranium”.
U Symbud Myntri Rangbah ula ba lada donkam, ka Sorkar ka lah ban phah da ka jingthoh sha ka Sorkar Pdeng ha kaba iadei bad katei ka Office Memorandum hynrei ia mynta hi ym pat lah ban ong eiei namar ba kim pat shong ia ka jingialang jong ka Kynhun Myntri.
“Ynda la shong ia ka jingialang jongka Kynhun Myntri ngin sa shim ia ka rai hynrei ngan iathuh lypa ia phi ba ka rai jong ka Sorkar Jylla ka long beit “Em” ban tih ia u Uranium” pynkut u Symbud Myntri Rangbah ka Jylla.
