Shillong, Nailur 23 : Ka Dorbar Shnong Laban hynne ka sngi kala pynkupburom ia u MLA ka South Shillong constituency Bah Sanbor Shullai halor ka jingshah thung dang shen kum u Myntri ha ka Sorkar Meghalaya Democratic Alliance-II.
U Bah Sanbor Shullai ula shah thung kum u Myntri Sorkar ba khmih iaka tnat Animal Husbandry and Veterinary, Arts and Culture, Printing and Stationary bad ka tnat Legal and Metrology ka Sorkar Meghalaya.
Haba kren ha kane ka sngi, u Bah Sanbor ula ai khublei ia baroh ki Dorbar Shnong jong ka thain Laban kiba la ai ka jingithuh iaka jingtreikam jong u naka bynta ka bha ka miat jong ki paidbah ka constituency baroh kawei.
“Ha ryngkat baroh ki paidbah jong ka South Shillong constituency nga ai khublei iaka Dorbar Shnong Laban kaba la ai ka jingithuh ia nga bad iaki kam ba nga leh naka bynta ka constituency baroh kawei” ong u Bah Sanbor.
U Bah Sanbor ula iathuh ba hadien ba ula shimti iaka shuki Myntri Sorkar, ula ioh jingtip ba ula ioh iaka mang tyngka kaba kot palat T.8 klur naka bynta ban siang thymmai iaka surok naduh Civil hospital Point ter ter shaduh St. John, Last Stop, Kenches Trace.
Ula ong ba nalor ka mang tyngka ban siang thymmai iaka surok, ula lah ruh ban pynioh pisa naka bynta ban shna thymmai iaki nala um hapoh ka thain Laban baroh kawei.
Nalor kane ula iathuh ruh ba shen yn sa ioh ruh iaka mang tyngka kaba T.1 lak ban shna pynbha iaka surok ha Hari Sabha Laban. “Baroh kine ki kam kin sdang hadien ka lehniam Puja” ula ong.
Haba ai khublei ia baroh ki trai jaka kiba la synniang ei ka jaka naka bynta ban pyntreikam iaki kam pynroi hapoh ka constituency u Myntri Sorkar ula ong “jingshakri paidbah kadei ka jingshakri ia u Blei namar kata to ia duwai lem khnang ba u Blei un nang aibor ba ngan nang lah shuh shuh ban shakri iaki paidbah bad iaka constituency baroh kawei”.
