Shillong, Nailur 23 : Ka jingsiew kaba kot T. 700 klur ka dang sahteng ban siew na ka bynta ki projek jong ka Jal Jeevan Mission (JJM) hapoh Meghalaya.
Haba pyntip ia kane ha ka sngi Ba-ar, u Myntri ka tnad Public Health Engineering (PHE) Marcuise N Marak ula ong, “Ha kaba iadei bad ka jingsiew, ngim pat siew kumba T.700 Klur kaba dei kaba dang sahteng”.
Ula pynshai ba kane kam dei satia namar ka jingbym leh eiei jong ka sorkar jylla hynrei kadei namar ba kila don ki jingpynslem na ka liang jong ka sorkar pdeng.
“Kam dei namar jong ka sorkar jylla, hynrei kadei namar jong ka sorkar India bad ka daw ka dei ba ki don katto katne ki kyndon treikam. Ka Sorkar India ka donkam ban shim ia ka rai namar ba la buh thong ha ka 31 tarik u Lber 2024 bad hadien katei, ka Sorkar India kam pat shim ia kano kano ka rai” la pyntip u Marak bad ka ong ba ka sorkar India kala pynjlan ia ka jingpyntreikam ia ka JJM haduh u snem 2028.
U Myntri ula pyntip ba ka pisa kaba la bhah yn sa pyllait sha ka jylla hadien ba la pyndep ia ka Auditing kaban plie lad ban ioh siew noh ia ka pisa sha ki kontraktor.
“Kumta, mynta ka sorkar India ka hap ban pyllait ia ka pisa kaba la mang na ka bynta ka Jal Shakti Ministry katkum ka jingbthah jong ka Tnad Pla Tyngka, ka rukom leh ia ka Audit kaba iadei bad ka Jal Shakti Ministry, shisien ba la pyndep ia ka auditing ia ka pisa yn sa pyllait sha ka jylla bad shisien ba ia ka pisa la pyllait yn sa sdang noh ia ka jingsiew” ula ong.
U Marak ula kubur ba ka jingsahteng ka jingsiew kala ktah ia ki kam jong ki katto katne ki projek, ha kaba ki kontraktor kiba lah kila bteng ia ki kam ki jongki katba kiwei pat kila pynsangeh ia ki kam tei jingtei namar ka jingkyrduh pisa.
Ula pynpaw ba u sngewthuh bhai a ka jingeh bad jingshitom jong ki kontraktor bad ula pynthikna ba kila shim ia ki lad bad pyrshang ban pynbeit noh ia katei ka mat.
 hapoh Meghalaya.){kind=link}