Shillong, Nailur 22: U nongshna phlim Khasi uba pawnam u Bah Pradip Kurbah un mihkhmat ia ka jyllla Meghalaya ha ka Asian Project Market (APM) 2025, kaban long ryngkat lang bad ka 30th Busan International Film Festival (BIFF) ha South Korea.
Ka projek ka jongu bala ai kyrteng “Moon” kala shah jied kum kawei na ki 30 tylli ki phlim kiba la jam shaphrang na ki 15 tylli ki ri, na ka jingthaw ia ka rekod haduh 455 tylli ki phlim kiba la phah mynta u snem.
Ka Asian Project Market kadei ka rynsan kaba heh hapoh ka dewbah Asia ha kaban pynmih ia ki phlim bad ka rynsan bei tyngka ia ki nongshna phlim. La pynlong man la ka snem kum shi bynta jong ka BIFF ha Busan, South Korea, ka wanrah lang ia ki Director bad ki phlim kiba dang shna bad ban pyniadei bad ki Producer na kylleng ki ri, ki nongbei tyngka, ki nongsam bad ki nongpynlong ia ki tamasa. Na ki 100 tylli ki aplikeshon, tang kumba 30 tylli ki projek kiba la shah jied man la ka snem, kaba pynlong ia ka jingiakob kaba heh bad kaba shongkhia. Kiba bun ki phlim kiba la pynithuh ia ka APM kila iaid shakhmat ban leit sha ki tamasa phlim kiba heh ha ka pyurthei, kynthup ia ka Cannes, Berlin bad Venice.
Ka 2025 Asian Project Market (APM), kaba la sdang ha ka 20 tarik u Nailur, kan kut ha ka 23 tarik u Nailur ha ka por ba long ka 20th Edition jongka Asian Contents & Film Market ha BEXCO. Ki projek kiba la shah jied hapoh jongka kyrdan
‘sponsor category’, ha kaba ki nongjop yn sa pynbna ha ka APM Awards Ceremony ha ka 23 tarik u Nailur.
Da ka jingring dur ha ka rilum Khasi jong ka jylla Meghalaya, ka phlim Moon ka pyni ia ka mat kiba iadei bad ki jingkynmaw, jingbakla bad ka jingkylla na kaba sniew. Baroh ki jingim briew kiba im da ka jingbakla, kaba ngi kit hapoh ka jong ngi ia kaba um ju khana sha kiwei pat” la ong u Bah Kurbah bad ka bynrap “Nga kwah ban kylli, lada ngi kren shaphang ka jongka, kan wanrah ia ka jingsuk ne jingsngewsih shuh shuh?.
Ka phlim kadei kaba la pynwandur ha ka sur ki poitri, kaba la ngam jylliew ha ki jaka kiba sngem na ka jinglong jingman jong ka suinbneng ha ka rilum Khasi, kaba ai ia u slap kum ka dak jong ka jingpynkhuid bad jingpynthymmai. Da kaba ioh mynsiem na ka riti dustur tynrai ki Khasi, u Bah Kurbah ula pyni ia ka jonglong jaijai bad ia ka rukom im kaba jarjar bad ki jingkynmaw kiba kren kum ki ktien kiba khlain.
U nongshna phlim uba la pyntbit hi dalade na Shillong, u Bah Kurbah ula sdang suki pa suki ban don ia ka kyrdan ha ka pyrthei. Kham hashwa jong une u snem, ka phlim ka jongu “The Elysian Field” kala jop ia ka Best Film bad Best Director ha ka Moscow International Film Festival. Ha u snem 2019, ula ioh ruh ia ka Jiseok Award ha ka BIFF na ka bynta ka jingpyniaid iew, kaba la pynlong ia u kum uwei na kiba na ka ri India ban don ia ka sur kaba laitluid.
Ia ka phlim Moon la pynmih da ka Kurbah Films ryngkat ka jingiatreilang bad ka Hello Meghalaya bad Shiven Arts, ha kaba 30% na ka jingpynlut ia ka pisa ka tyngka la dep ban ioh noh. U Bah Kurbah bad ka kynhun ka jongu ki dang wad ban ioh ia ki paralok na kiwei pat ki ri ban iatreilang ban pynmih ia ki khana Khasi ha ka rynsan jong ka pyrthei.
 2025, kaban long ryngkat lang bad ka 30th Busan International Film Festival (BIFF) ha South Korea.){kind=link}