Tura, Nailur 22 : Ki Nongtrei ka Garo Hills Autonomous District Council (GHADC) kiba don ha ka lama Non-Gazetted Employees Association (NGEA), kila pdiang ia ka jingtyrwa song jingialang (bailout package) ka Sorkar Jylla ban iarap siew tulop noh ia ki Nongtrei naduh ka 1 tarik Naiwieng 2025.
Kane ka rai ka NGEA kala mih na ka jingialang jong ka Sub Committee bala thung da ka Sorkar ban iakren halor ka jingkyrduh pisa ka Garo Hills Autonomous District Council (GHADC) ba long ha ka sngi Nyngkong, ban lah wanrah ruh ia ki jingpynkylla bad pynbeit ryntih ia ka rukom pyndonkam ia ka pisa pilain hapoh ka Council.
Ia kane ka jingialang la pyniaid da u Deputy Commissioner ka West garo Hills Vibhor Agarwal, kaba la iakren sani halor ka jingtyrwa song jingiarap ka Sorkar-kaba thmu ban weng noh ia ki jingeh bala neh slem hapoh ka Council, khamtam ka jing bym lah ban siew tulop sha ki nongtrei la bun bun bnai.
Kane ka Sub Committee ka kynthup ruh ia ki riewpawkhmat kum u Father Januarius Sangma, Reverend Frithing D. Sangma, (rtd) Ophisar MCS Charming N. Sangma bad CEO ka Tura Municipal Board J. R. T. Sangma. Ia ka kynhun NGEA la ialam da u President Brithen M Sangma bad Timtim N Sangma nalor kiwei kiwei ki dkhot.
Ha ka jingiakren, ki nongtrei ka GHADC kila pynpaw ia ka jingsngewkhia halor ka jingpynneh ia ka jinglong laitluid jong ka Council, da kaba sheptieng ba kane ka song jingiarap ka Sorkar kan knieh noh ia ka jinglong laitluid. U Deputy Commissioner ula kular ha ki ba ka Sorkar kan ym mushlia da lei lei ruh ia ka jingtreikam ka Council.
Wat hadpeng kine ki jingsngewkhia, ki Nongtrei kila shim pat ia ka rai ban pdiang ia kane ka jingtyrwa song jingiarap, haba khmih ia ka kum ka sienjam bala ap la slem ban wanrah ia ka jingshngain ha ka pla tyngka. Ia kiba bun, ka kam kam long satia tang halor ka jingsiew khuid ia ka tulop hynrei ban pynthikna ruh ia ka rukom siew kaba thikna manla u bnai ha ki por ban dang wan.
U Deputy Commissioner ula pynpaw ruh ba ki nongtrei ka GHADC kiba la mad ia shibun ki jingeh namar ka jingbym ioh hok ia ka tulop, kila pynpaw ba ki kwah ia ka jingkular bad ka jingsiew ba tista. “Kam dei satia tang halor ka tulop ba sahteng hynrei ka dei ruh halor ka jingpynthikna ia ka jingsiew ba tista hadien habud. Ha baroh lang, ki nongtrei kila pyn paw ia ka jingkmen bad kane ka jingtyrwa” ong u Agarwal.
Ula pynpaw ruh ba ka NGEA kan sa iakren para dkhot halor kane ka kam hashuwa ban ai jubab bad ki mat ba kila pynsngew ruh yn sa leit ban rah sha ka Sorkar Jylla. “Baroh ki jingpynsngew jong ki, yn sap hah sha ka Sorkar ba kan pynshai ha ka rukom kaba dei, bad shen yn sa phah ruh ia ka kaiphod khnang ba ka Sorkar kan lah ban sdang noh ia ki kam ba donkam ban leh” ula ong.
 kiba don ha ka lama Non-Gazetted Employees Association (NGEA), kila pdiang ia ka jingtyrwa song jingialang (bailout package) ka Sorkar Jylla ban iarap siew tulop noh ia ki Nongtrei naduh ka 1 tarik Naiwieng 2025.){kind=link}