Shillong, Nailur 20: Ki Nongialam Shnong na ki thain Shnongpdeng, Dawki bad Darang kiba don ha West Jaintia Hills kila dawa naka Sorkar Jylla ban shimkhia iaki mat jingdawa jong ki kynhun bapher bapher kiba don bynta ban kyntiew iaka kam jngohkai pyrthei hapoh ka jylla Meghalaya.
Kane ka wan hadien ba ka All Khasi Meghalaya Tourist Taxi Association (AKMTTA) dang shen kala pynlong ka jingiakhih ha kaba kala don ruh ka jingsangeh kit ia ki nongwan shangkai pyrthei sha ki jaka jngohkai pyrthei (Tourist Spots) ha kylleng ka Jylla.
Haba kren sha ki lad pathai khubor u General Secretary ka Dorbar Shnong Shnongpdeng u Bah Dapbor Syngkrem ula ong, ba hadien ka Sohra, ka thain West Jaintia Hills kadei kawei ka thain kaba khring bha iaki nongwan shangkai pyrthei hapoh ka Jylla Meghalaya.
U Bah Dapbor ula iathuh ba ha ki thain Shnongpdeng, Darang, Dawki, West Jaintia Hills, bun ki paidbah ki im jakpoh na ka kam jngohkai ne Tourism.
Ula ong ha ki khyndiat sngi bala leit, ka Jylla kala sakhi ba ki Association pyniaid kali kamai Tourist (AKMTTA) kila pynlong daka jingiakhih kaba la ktah iaka kam Tourism namar ki nongwan shangkai pyrthei kila duna bha ban hiar sha ka thain West Jaintia Hills.
“Ngi kyntu ia ka Sorkar ban shimkhia ia baroh ki jingeh ki ba mih naduh ki jingdawa jong ki Association pyniaid kali Tourist, ban pynbha iaki surok bad kiwei kiwei kiba kam haba iadei bad ka jingkyntiew ia ka kam Tourism hapoh Meghalaya” la ong u Bah Dapbor.
U Bah Dapbor ula ong ruh ba ka jingsniew ki surok kadei kawei ka daw bah ba duna ki nongwan shangkai pyrthei ban hiar sha ka thain West Jaintia Hills. “Ngi dawa na ka Sorkar ban pynbha ia ki surok ba pyniasoh ia ki jaka jngohkai pyrthei hapoh ka thain” ula ong.
Lah ban kdew ba ha ka 23 tarik mynta u bnai ka tnad kam pohiing, ka tnat Tourism, ka Ophis u Myntri Rangbah ka Jylla bad ka AKMTTA kin shong jingialang ban iathir halor ki mat jingdawa haba iadei bad ka kam jngohkai pyrthei.
