Kyrtoh kylla ka jingleh ka AKMTTA | Shah khang lynti lut ki kali Meghalaya ha Jorabat

Shah bat ka kali u Myntri barim ka Jylla Rakkam A Sangma

Shillong, Nailur 18 : Ka jingiakhih ka All Khasi Meghalaya Tourist Taxi Association (AKMTTA) ban khang ia ki kali Tourist na Assam ba kin leit sha ki jaka jngohkai ka Jylla, kala kyrtoh kylla ym tang ia ki kali tourist kiba na Meghalaya ba kin rung sha Assam hynrei wat ia ki paidbah nongleit jingleit na Jylla, kiba la shah pynhiar lut ha shiteng lynti ha Jorabat.

Kane ka jingjia kala mih kum ka jingpynphai kylliang jong ki nongniah kali tourist ka Assam ia ka jingleh jong ka seng All Khasi Meghalaya Tourist Taxi Association (AKMTTA).

Kane ka jingiapyni bor hapdeng ki kali Tourist na Meghalaya bad Assam kala sdang haba sdang jong kane ka taiew hadien baka All Khasi Meghalaya Tourist Taxi Association (AKMTTA) kala khang lut ia ki kali tourist na Assam ha kylleng ki jaka kynthup ha Umtyngngar, ba kin iaid palat ia ka Shillong.

Kane ka seng kala iasaid ba ka jingailad ia ki kali tourist na Assam ba kin leit kat shaba ki mon, kala ktah jur ia ka kamai jong ki nongniah kali trai jylla.

Baroh ki kali na Meghalaya kynthup ki kali Tourist bad kali shimet, kila shah pakhang lynti syndon ha ka step sngi Palei ha Jorabat khlem da ailad shuh ba kin rung sha Assam. Ki nongleit jingleit kila hap ban hiar ha Jorabat bad shim bujli da ki kali Assam ba kin poi sha ki jaka ba ki thmu ban leit.

Baroh ki nong Meghalaya kiba leit wad jingsumar sha ki hospital ka Assam, kiba iabeh ia ka liengsuin ne ka rel ban leit jingleit, kila shah pynhiar lut ha Jorabat.

Ka kali u Myntri barim ka Jylla Rakkam A Sangma ruh kala ngat ha kane ka jingpakhang lynti hynrei kham hadien ula ioh ban iaid da ka jingiarap ki Pulit ka Assam.

Ki paidbah nongleit nongwan haba iakren bad ka Shlem, kila pynpaw ia ka jingbitar halor kane ka jingjia bad kynnoh beit beit ia ka seng All Khasi Meghalaya Tourist Taxi Association (AKMTTA)-kum ka daw kaba buh iaki nong Meghalaya ha kane ka khep ba long mynta.

Kila kyntu ia ka Sorkar Jylla ba kan tuklar mardor ia kane ka jinglong jingman bad ban tehlakam ia ka All Khasi Meghalaya Tourist Taxi Association (AKMTTA) hashuwa ba kiei kiei baroh kin nang jur.