Shillong, Nailur 16 : Ka Mawshynrut Constituency kala ioh mynta ia u MLA u ban shong ha ka shuki kum u Myntri Sorkar, kaba la wan jia hadien 20 snem hadien I kong Maysalin War (Bam Kwai ha Dwar U Blei).
Une u Myntri Sorkar u dei u Bah Methodius Dkhar, MLA ka HSPDP, uba la bam smai kum u Myntri ha ryngkat bad 7ngut kiwei pat, ha ka jingialang ba long ha ka sngi Ba-ar ha Raj Bhavan.
Haba kren bad ki lad pathai khubor, u Bah Methodius ula pynpaw ia ka jingsngewnguh ia ki paidbah ka Mawshynrut constituency bad ia ka West Khasi Hills da kaba ong ba ka jingioh jong u ia ka shuki Myntri na ka constituency bad ka thain hadien 20 snem, kan ai mynsiem bha ia ki trai shnong ka thain.
“La jan 20 snem, ngim shym la ioh shuh ia ka lad ban don ha ka Kynhun Myntri ka Sorkar. Nga kyrmen ba da ka jingpynrung ia nga ha ka Kynhun Myntri, kan sa ai mynsiem ia ki paidbah ka West Khasi Hills bad Mawshynrut Constituency” ula ong.
Ula kular ba kum u nongialam ka party bad ka party ruh kan iaid buddien ia ki jingdawa ba dang sah teng ha kaban pynbeit noh ia ka jingiakajia khappud bad ka Assam, ban pyntreikam ia ka Inner Line Permit (ILP) bad ban pynrung ia ka ktien Khasi ha ka khyrnit ba phra jong ka riti synshar ka Ri.
“Lyngba kane ka Sorkar, ngin pyrshang ban tynruh ia kine ki jingdawa ba hakhmat eh jong ka party” ong u Bah Methodius.
Ha kajuh ka por, une u MLA ka Mawshynrut ula ai khublei ia ki nongialam ka party khamtam ia u Myntri Sorkar ban leit noh Bah Shakliar Warjri uba la plie lynti ia u ban ioh rung ha ka Kynhun Myntri.
“Nga kit bok kitrwiang ia u Bah Warjri” ong u Bah Dkhar haba kular ban iatreilang bad u lem bad ka party kum ka kynhun.
.){kind=link}