Shillong, Nailur 16: Ka National People Party (NPP) ha ka sngi Ba-ar, kala pdiang burom ia u MP barim ka Manipur Lorho S PFoze uba la wan pyniasoh sha ka party.
Ia u PFoze la pdiang sngew da u National President bad Myntri Rangbah ka Jylla Conrad K Sangma ha ka ophis trei kam ba thymmai jong ka NPP, ha ka jingdonlang u President ka NPP Meghalaya Bah Prestone Tynsong bad kiwei kiwei ki nongialam ka party.
U Lorho S PFoze u dei u MP barim ka Lok Sabha uba la mih khmat ia ka Outter Manipur seat ha u snem 2019 haduh u snem 2024. U PFoze u la shah jied kum u MP na ka Naga People Front (NPF) bad u dei u wei na ki nongialam na Manipur jong ki jaitbynriew Naga.
Haba kren hadien ba shah pdiang burom, u Lorho S PFoze u la iathuh ba hadien ba u shah jied kum u MP, ki don shibun ki jingkhmih lynti da kaba pyrkhat ba kum u dkhot ka Parliament kin don shibun kiei kiei ba un noh synniang na ka bynta ka ri, hynrei long leh nohei ka jinglong MP namar ym don ba sngap ha Iingdorbar Parliament na ka daw ka jingduna paid.
U ong ba dei halor kane ba ula leit iasoh bad ka North East MP Forum kaba don 39 ngut ki MP ha Lok Sabha ban lah pyn sngew ia ka sur jong ka dong ka thain.
U Lorho ula ai khublei ia u National President ka NPP Conrad K Sangma, uba la khot sngewbha ban wan pyniasoh noh sha ka NPP haba pynpaw “Nga da sngew sarong shisha ba mynta nga la pyniasoh sha ka NPP” bad bynrap “Ngi khmih lynti ba ha kawei ka sngi, ka NPP kan dei jong baroh bad khamtam eh hapoh ka dong ka thain North East bad ruh ba ngin ia pynkhlain iwei ia iwei pat” ong u PFoze.
U dkhot ka National Committee Lakpachui Siro ula ong, ka jinglah jong u National President ka NPP ban khroh ia u Lorho ban pyniasoh sha ka NPP kan long ka jingkyrkhu ba khraw ia ka party ha shwa ka election jong u snem 2027 namar ba u dei u nongialam uba ki briew ki ieit bad sngewtynnad bha.
U la ong, “U Lorho PFoze u mihkhmat ia ka parliamentary constituency kaba don haduh 28 tylli ki Legislative Assembly Constituency bad u dei uba don ka jingiadei ba iajan bha bad ki paidbah ha baroh kine ki constituency…kumta ka jingwan pyniasoh jong u sha kaNPP kan long ka jingmyntoi kaba khraw bha”.
U National President Conrad K Sangma u la ong, u PFoze u dei u nongialam uba baroh na ki jait bynriew bapher bapher ki pdiang ia u kum u nongialam ha baroh kawei ka jylla bad kiba bun ki don ka jingkhmih lynti na u.
“Kane ka jingwan ban pyniasoh sha ka NPP kan dei ka jingkylla ba khraw hapoh ka jylla Manipur namar ba ha u snem 2027, kan don ka election hapoh ka jylla Manipur bad ka kynhun jong ka NPP kala pynkhreh tyngeh bha. U PFoze un don ia ka bynta ba khraw ban wanrah jingkylla ha ka sain hima sima hapoh ka jylla Manipur” ong u Conrad.
 ha ka sngi Ba-ar, kala pdiang burom ia u MP barim ka Manipur Lorho S PFoze uba la wan pyniasoh sha ka party.){kind=link}