Shillong, Nailur 15 : U Myntri Rangbah ka Jylla Conrad K Sangma ula bujli ia ka Kynhun Myntri jong kane ka Sorkar Meghalaya Democratic Alliance-II ba ialam da ka NPP, da kaba weng noh haduh 8 ngut ki Myntri ban thep thymmai da kiwei pat.
Kane ka rai kala mih hadien ka jingdap arsnem shiteng jong ka Sorkar ba u ialam.
Ka khubor ka iathuh ba u Myntri Rangbah ula leit iakynduh ia u Lat ka Jylla CH Vijayashankar ha Raj Bhavan bad aiti ia ka thup kyrteng jong ki 8 ngut ki MLA ki ban shimti kum ki Myntri ka Sorkar ba thymmai.
Kine ki 8 ngut ki kynthup ia 4 ngut naka NPP- MLA ka Jowai Wailadmiki Shylla, MLA ka Jirang Sosthenes Sohtun, MLA ka Dalu Brening A Sangma bad MLA ka Resubelpara Timothy D Shira.
Arngut ki dei na ka United Democratic Party (UDP) ba kynthup ia u MLA ka Mairang Bah Metbah Lyngdoh bad MLA ka Amlarem Bah LAhkmen Rymbui.
Ki arngut kiwei pat ki dei u MLA ka HSPDP na Mawshynrut Bah Methodius Dkhar bad u MLA ka BJP na South Shillong Bah Sanbor Shullai.
Ki Myntri kiba la shah weng noh ki kynthup ia u Rakkam A Sangma, u Bah Comingone Ymbon, kong Ampareen Lyngdoh bad Marcuise N Marak lane Abu Taher Mondal kiba dei na ka NPP, katba arngut ki dei na ka UDP-Bah Paul Lyngdoh bad Bah Kyrmen Shylla, u MLA ka HSPDP na Mawthadraishan Bah Shakliar Warjri bad u MLA ka BJP Bah AL Hek.
Ka jingpynbam smai ia ki Myntri thymmai kan long ha Raj Bhavan ha ka sngi Ba-ar por 5 baje janmiet.
