Shillong, Nailur 15 : U Myntri Rangbah ka Jylla Conrad K Sangma, ula pynpaw ia ka jingsngewsih kthang halor ka jingiap jong I khynnah saw snem Insaphira Lyngdoh Mawnai, iba jah na iing ha Nongrah ha ka step Sngi U Blei bad lap pat ia ka metiap ha ka rukom kaba ishankhmat.
Ia ka met jong ine I Khynnah la lap ha ka step sngi Nyngkong na kawei ka jaka lang um jong ka Iing ba dang shna ha ka thain. Ka rukom lap ia ka met ka pynsuba jur ba ine I khynnah I shah pyniap.
Haba shimkhia ia kaei kaba jia, u Myntri Rangbah ula bthah ia ka Tnad Pulit ba kan pynlong ia ka jingtohkit kaba bniah ia kane ka jingjia bad ban pynthikna ba kito kiba donkti, ki dei ban shah kem khlem ka jingpynslem.
“Nga phah ia ka jingsngewlem sha ki Kmie Kpa bad ki baieid bathoin jong I” ong u Conrad haba thoh ha X.
Lah ban kdew, ia ka metiap jong ine I khynnah la bhan da u maw ba kan ngam ha kane ka jaka ba lang umslap.
U Superintendent of Police ka East Khasi Hills Bah Vivek Syiem bad ka kynhun jong u, kila leit poi sha katei ka jaka ban pynlong ia ka jingtohkit.
