Nongpoh, Nailur 14: Ka Nongpoh Town Committee lyngba u Chairman Bah S.F Lyngdoh bad u Secretary Bah R.Kharkamni, ki la phah ia ka khubor sngewlem halor ka jingkhlad noh u MLA barim ka Nongpoh Dr.DD Lapang, uba la bat haduh san sien kum u Myntri Rangbah ka Jylla.
Ki nongialam ka Nongpoh Town Committee ki la pynpaw ba ka jingkhlad noh u Dr. DD Lapang ka long ka jingduh nong kaba khraw ym tang ia ka ing ka sem, ki khun ki kti bad ka kurim jong I, hynrei ka jingduh nong kaba khraw ia ka Nongpoh, ka Ri Bhoi District bad ha ka jylla hi baroh kawei.
Ki la pynpaw ruh ba kum u nongialam uba la bat ia kyrdan MLA bad Myntri rangbah ka jylla, u la noh synniang shisha ha baroh ki liang ban kyntiew ia ka Nongpoh, ka Ri Bhoi District bad ka jylla hi baroh kawei.
Ki la ong ruh ba u Dr. DD Lapang u don shisha ia ka kyrdan nongialam ha kaba ym tang ba u la shakri ia ki paidbah ka jylla bad ruh u long ka jingai mynsiem ia kiwei pat ki para nongialam ba kin bud ia ki dienjat jongu ha ka kyrdan kum u nongialam uba don ka jingkitkhlieh ha baroh ki liang.
Ka Nongpoh Town Committee ka duwai ba u Blei un ai ia ka jingpyntngen ia ka Iing ka sem bad ka jingjah thaid ba shi junom ia ka mynsiem jong I Dr Lapang.
