Ioh ka MBDA haduh T.224 klur ban pyntrei ia ki project ha ki lai snem ha Jylla

Shillong, Nailur 11 : Ka Meghalaya Basin Development Authority (MBDA) kala ioh pdiang ia ka song pisa haduh T. 224 klur baroh lang ha kine ki lai snem, bad T.182.30 klur la ai tang ha u 2024-25 ba kan pyntrei ia ki project bapher bapher hapoh ka Jylla.

T.24 klur la pyllait ha u 2023-24 bad T.17.70 klur ha u 2022-23, iathuh u Myntri Rangbah Conrad K Sangma ha Iingdorbar Thawin haba jubab ia ka jingkylli bala wanrah da u MLA ka VPP na North Shillong Bah Adelbert Nongrum ha ka sngi Palei.

U Conrad u pyntip ba ka MBDA kan ngat ha ka jingleh audit da ka Comptroller & Auditor General of India ban pynthikna ia ka jingtreikam kaba shai bad ba khuid ba suba.

Ia ka MBDA la seng ha u 2012 hapoh ka Society Registration Act, 1960 kum ka Special Purpose Vehicle (SPV) bad ka Society.

Ula pynshai ba ia ka Meghalaya Basin Management Agency (MBMA) ka dei ka non-profit organization ne ka seng trei mon sngewbha, la seng hapoh ka kyndon 8 jong ka Companies Act bad la wanrah ia ka namar ka jingdonkam jong ki tnad treikam ba na shabar kum ka IFAD.

U Myntri Rangbah ula batai ba iaka MBDA la pynwandur ba kan pyniaid lang ia ki project kam pynroi bapher bapher bad ki project na ki buit thymmai, bad kam don pud satia ia ka jinglah jong ka Agency ba kan pyntrei ia ki project, la ki dei ki project ba bei tyngka na shabar (Externally Aided Project) lane ki Centrally Sponsored Scheme (CSS).

U Conrad ula pyntip ba ka rukom thungkam hapoh ka MBDA ka dei kaba la buh ryntih ba kan long kaba shai bha, kynthup ia ka jingdonkam ka kyrdan bad ban pass ia ki eksam.

Ula iathuh ba baroh 729 ngut ki nongtrei hapoh ka MBDA ki dei ki trai shnong bad ka rukom thungkam ka long kat kum ka Human Resource Policy.

Haba u Bah Adelbert u pan jingtip la ka jingdonkam ban buh ia kawei pat ka bor ban pyntreikam ia ki EAP ka pyni ia ka jingbym lah jong ki Tnad Sorkar bad Ophisar ban pyntrei ia ki project, u Myntri Rangbah ula jubab da kaba ong “Em, ki tnad Sorkar ki lah ban pyntrei bad ki la leh bha, da ka jingnang kiew ka mang tyngka na u snem sha u snem”.

“Ki project kiba dei jong ki Tnad ki dang iai bteng. Ka mang tyngka jong ngi kala nang kiew na ka T.9000 klur sha ka T.30,000 klur mynta…ka mang tyngka jong baroh ki tnad kila nang kiew. Kumta, ka jingkylli ba khlem pyndonkam ia ki tnad ka dei kaba bakla. Ki long kiba lah bad dei namar kata b aka mang tyngka ruh kala kiew. Ka jingkylli hi ka dei ka jingiatreilang” ula kynthoh.

Ula pynpaw ba ka jingpyndonkam ia ka MBDA ban pyntrei ia ki project ka dei eh namar ka jingdonkam ban wanrah ia ka jingiatreilang hapdeng ki tnad bapher bapher, ym ba ki Tnad Sorkar kim lah ban pyntrei ia ki project”.