Shillong, Nailur 10 : U MLA ka UDP na Amlarem Bah Lahkmen Rymbui ha ka sngi Balang, ula kynthoh pynsam rkhie ha Iingdorbar Thaw Ain ba ki briew ha ki jaka sor ki sngewtynnad ban bam ja miet da kaba tbeh mombiti (Candlelight Dinner) katba ki nongshongshnong ha constituency jong u pat la pynbor ba kin bam ja miet da kaba tbeh mombiti manla ka miet namar ka jinglip bording.
Haba pynpaw ia ka jingsngewkhia ha Iingdorbar, u Bah Rymbui ula ong ba wat hapdeng ka jingdon ia artylli ki power project-ka Lakroh bad Leshka, ka thain ka mad ia ka jingduna bording kaba jur bha.
Ula dawa ia ki borkhmih ba kin shim ia ki sienjam ha kaban pynduna ia ka jingpynlip bording bad kyrmen ba ki jingpyrshang ba dang iaid shakhmat kin pynduna ia ka jingduna bording.
Haba jubab, u Myntri kam bording Abu Taher Mondal ula kular ba la shim ia ki sienjam ban pynduna ia ki jingpynlip bording ha ka thain.
Halor ki daw ka jingpynlip bording khari khari, ula ong ba bun na ki jaka hapoh ka Amlarem Sub-Division bad thain Bakur-Dawki-Darrang kila ioh ia u slap uba jur bha, ka jingpom pyrthat bad ka lyer kaba jur, kaba lam sha ka jingbthei ki conductor bad jingkhyllem ki dieng ha ki waiar bording khamtam ba bun ki waiar bording ki iaid lyngba ki jaka rep kum ki jaka rep kwai, tympew, kait, siej bad kiwei kiwei.
U Myntri ula pynpaw ruh ia ka jingthmu ban pynlip bording ba shipor ban lah pyniaid beit ia ki kam ban pynjanai ia ka jingtan lain bording hapoh ka RDSS bad LR.
U Myntri ula pyntip ruh ba ka Tnad ka dang trei mynta ia ki kam ban kyntiew kyrdan ia ki jingtei kynthup ia ka Syndai Sub-Station, ka ban ioh shen ia ka jingmynjur ban lah weng ia ka jingduna bording.
Ula kular ruh ba ka jingeh bala mad da ka Rajabala constituency ruh yn sa pynbeit noh hapoh une u snem bad ula shimkhia mynta ban pyntreikam noh ia ka sub station ha ka thain.
U Myntri u pyntip ba ki don haduh 16 ngut ki linemen/jugali hapoh ka Amlarem sub-division bad ka jingpyrshah kala iaid shakhmat ban pynbeit ia ki jingeh kiba mih bad pynjanai ia ka jingsam bording ha ka thain.
 katba ki nongshongshnong ha constituency jong u pat la pynbor ba kin bam ja miet da kaba tbeh mombiti manla ka miet namar ka jinglip bording.){kind=link}