Shillong, Nailur 09 : U Myntri Rangbah ka Jylla Conrad K Sangma ula pyntip ba ka Meghalaya kala mad ia ka jingduna ha ka jingiohkam ki samla ba kot haduh 67,500 shisnem ha ki tnad Sorkar.
Haba pyntip ia kane ha ka Iingdorbar Thaw Ain ha ka sngi Ba-ar, u Myntri Rangbah ula iathuh ba ka Sorkar Jylla kala pynkhreh ia ka plan kaba pura ban leh eiei halor kane ka jingeh.
Kat kum ka jingong jong u, kumba 70,000 ngut ki samla ki dei kiba lah ban rung kam manla u snem hynrei ki Tnad Sorkar ki lah ban aikam tang kumba 2000-2500 ngut shisnem.
“Ka don ka jingduna ba kot 67,500 ki kam ha ki tnad Sorkar, ta ka daw ka Sorkar kala pynkhreh ban wanrah ia ka plan kaba pura ban iarap ia ki 70,000 ngut ki samla kiba dei ban iohkam ba kin rungkam” ula ong haba jubab halor kane ka mat.
U Conrad ula pyntip ba ki don 7000 ki kam ba lait ha ki tnad Sorkar ia kane ka jingpynlong ia ka eksamin thungkam ka dang iaid shakhmat.
Ban lah leh eiei halor kane ka jingduna, u Myntri Rangbah ula ong ba ka career counselling programme ka dei shibynta jong kane ka plan kaba heh bha, kaba thmu ban btin lynti bad kyrshan ia ki samla ha ki 25 jait ki kam ba kynthup ia ki kam iada ri, kam bank, engineering bad bun kiwei kiwei.
U Myntri Rangbah ula pynpaw ba ka career counselling programme ka dei kaba la pynbeit ryntih bha, bad ka Meghalaya State Skill Development Society (MSSDS) kan long kum ka nodal agency. Ia kane ka prokram yn pyntreikam ha ki 34 tylli ki counselling centre, ha kaba ki nongai jingmut bala dep hikai pyntbit ne ki trained career advisers kin btin lynti bad iasyllok bad ki samla.
Ka jingthmu ka long ban pynlah ia ki samla ba kin shim ia ki kabu ha ka lad iohkam la ka dei ha ki kam Sorkar ne kam shimet.
U Nongialam ka Liang Pyrshah Mukul Sangma, ula iaroh ia ki sienjam bala shim da ka Sorkar bad ban jur ia ka jingdonkam ban iabat kti haba pynkhreh ia kino kino ki kam ba kyrpang, khamtam ha ki kam iada ri bad kam shipai.
U Myntri Rangbah ula kular ba ka prokram ka dei kaba la pynwandur ban leh eiei halor kine ki jingdon kam bad iarap ia ki samla da ka jingbtin lynti bad jingkyrshan.
Nalor kane, u Conrad ula iathuh ruh ba ka Sorkar Jylla kala lum thup ia ki lad iohkam iohjam ha ki liang bapher bapher kum shi bynta jong ka Vision 2030.
“Ka Sorkar kala dep ithuh ia ki lad iohkam kiba la khmih lynti ha man ki shnat treiam bad ia ka jing donkam jingkynshew ban kynjoh ia kine ki thong” ula ong.
Kat kum ka jingong jong, ka kam jngohkai la khmih lynti ba kan lah aikam kumba 54,000 ngut, da ka jingkhmih lynti ia ka jingnang bun ki five star hotel badka jingdawa ba nang kiew ha ka jingdonkam ia ki nongniah kali bad ki nongtrei.
U Conrad u pyntip ba ka Sorkar kala iatreilang bad ka MSSDS ban ai ia ka career counselling ia ki samla, haba khmih antad ia ki kam kiba donkam da ka Jylla ha kine ki 10 snem ban wan. Ka jingthmu ka long ban hikai ia ki samla da ki sap ba donkam bad ki jingtip ba kin shim kabu ia ki lad iohkam ki ban nang mih.
