Agartala, Nailar 28: U Myntri sorkar ka jylla Tripura ba peit ia ka tnad Panchayat u Kishore Barman ha ka sngi Balang u la pynbna ba ka sorkar jylla kala pynkhreh ban wanrah da ka kor Artificial Intelligence (AI) sha baroh ki panchayat ban kyntiew ia ka jingkhuid jingsuba, ka jingtrei kam kaba kham biang shuh shuh, bad ka jingkitkhlieh ha ka synshar shnong.
U Barman u la ong ba ka Tripura kala ioh pdiang ia u mawjam kaba kylla long ka jylla kaba nyngkong eh hapoh jong ka ri India ban pynbiang shispah na ka shispah ïa ki kor kompiwtor bad ka jingpynïasoh internet ha baroh ki panchayat. Ka rukom e-filing ruh ka don ha ka jaka jong ka, kaba pynsted ia ki kam pynroi bad pynsuk ia ki rukom synshar.
Haba pynpaw ïa ki jingpynkylla digital reform, u myntri u la kdew ba u Myntri Rangbah ka Jylla u Manik Saha u la pyntreikam kham mynshwa ïa ka Amar Sarkar portal.Hapoh kane ka jingthmu, ki heh jong ka Panchayat bad ki nongmih khmat ba la jied ki dei ban leit jngoh ym duna ia ka 20 tylli ki longing ha ki jaka nongkyndong ban lum jingmut halor ki mat ba kongsan, kynthup ia ka koit ka khiah, ka pule puthi, ka um dih, ki surok, bad ki kot ki sla jong ka jaka. Ia ki jingeh ba la pyntip la buh ha ka portal, bad ki tnad ba iadei kam ki dei ban pynbeit ia ki hapoh 15 sngi.
“U Myntri Rangbah duh ka ri, dalade hi u la ïaroh ïa kane ka sienjam bad u la ai jingmut ban pynbud ïa ka ha kylleng ka ri.Da ka jingpynshlur na ka Tripura, ka Madhya Pradesh ka la dep ban wanrah ïa kane ka portal kaba kum kane,” ong u Barman.
Haba peit sha khmat, u myntri u la ban jur ba ka jingpyniasoh ia ka AI kan long ka jingkiew kaba bud ha ka jingsynshar. “Ka jingthmu jong ngi ka long ban pynïasoh ïa ki Panchayat bad ka AI technology khnang ba un lah ban pynpoi ïa ka jingmyntoi kaba heh tam sha ki paidbah,” u la bynrap.
 sha baroh ki panchayat ban kyntiew ia ka jingkhuid jingsuba, ka jingtrei kam kaba kham biang shuh shuh, bad ka jingkitkhlieh ha ka synshar shnong.){kind=link}