Guwahati, Nailar 26: Ha kawei na ka jingjia ba kham phylla, ki nongwan kyntur pud beain hapoh Nagaon district, Assam, kila sdang ban pynpra noh hi ia la ki jong ki iing ki sem kumjuh ruh ia ki dukan ban lait na ka jingduh nong kaba heh ia kaba la pynbeit ban kyndang ha ka 27 tarik mynta u bnai.
Naduh ka por mynstep, ki paidbah nong shong shnong kila pyndonkam da ki JCBs ban pynpra ia ki iing ki sem bad kumjuh ruh ia ki dukan ia kiba la shna beain ha ki jaka jong ka sorkar.
Ka jingpynbna pynkynriah, kaba la pynmih da ka bor synshar district, ka kynthup ia ki jaka sah beain ha Batadrava bad ha Alitangani mouzas, kynthup ki jaka iew. Ban pynthikna ia ka suk ka sain, la pynjari ia ka kynhun pulit kaba khlain bha, ha kaba la pynlong ia ki jingiaid pahara bad ki lama shwa ban sdang ia ka jingkhynra.
U Deputy Commissioner ka Nagaon District uDevashish Sharma haba ia kren bad u nongthoh khuor u la ong, “Shi bnai mynshwa, ngi la dep ban phah ia ka jingpynbna sha kito kiba la wan shong beain ha ki jaka jong ka sorkar.Kine la pan por na ka jingshah kyndang bad kumta ngi ruh la pynjlan noh ia ka por bas hi bnai bad la pynjlan shuh shuh sa lai sngi.Naduh mynta ka sngi, ki paidbah kila sdang hi ban pynpra noh hi ia la ki jong ki iing ki sem bad ki dukan.Ka long kaba sngewtynnad ba kila sngewthuh ia ka jingwan buhai shnong beain bad kila pynpra noh hi da lade ia ki iing ki sem.Baroh ki don haduh 56 tylli ki longïing ki don ha ka thaiñ Batadrava.”
Shuh shuh na ka liang u Sharma u la ong, katba ki bor pyniaid Distict ki kham kwah ia ka jingbud ryntih da ka mon sngewbha, yn pynlong ïa ka jingpynkynriah lada donkam.
U Sharma u la ong, “Ngim kwah ban beh jubor ne kyndang da ka bor ia ki briew, hynrei lada ki jaka sorkar ki shah kyntur pud beain, ka dei ka kamram jong ngi ban pynlait ne pynthylli ia ki.”
Ha ka sien kaba nyngkong ha Assam, ki nongwan rung tuh bad kiba wan buhai beain ki la shim ia ka sienjam kaba pher ban pynpra ia la ki jong ki jingtei shwa ban pynlong ia ka jingpynkynriah ia ki briew. Ki pulit ki dang don ha katei ka jaka, hynrei ym shym la don kano kano ka jingjia kaba sngewsih haduh mynta.
Ka sorkar jylla ba ialam da ka BJP, ka la shim ia ka sienjam kaba tyngeh pyrshah ia ka jingwan buhai shnong beain, ha kaba ka la pyllait ia ki katto katne bigha ki jaka sorkar ha kylleng ka Assam ha kine ki bnai ba la dep.
