Dawa ka KHNAM ia ka Sorkar ban phah pynkylla noh ia ka thup ST ka Jylla

Shillong, Nailar 22 : Ka Khun Hynniewtrep National Awakening Movement (KHNAM) kala dawa ia ka Sorkar Jylla ba kan iakren bad ka Sorkar Pdeng ha kaban pynkylla ia ka Presidential Order 1950 ba iadei bad ka thup Scheduled Tribe (ST) ka Meghalaya.

Ha ka shithi sha u Chief Secretary Bah DP Wahlang bala phah ha ka sngi Thohdieng, u Working President ka KHNAM Bah Thomas Passah ula ong ba ka party kala kyntu ia ka Sorkar Jylla ban bthah ia ki bor ai Scheduled Tribe ka Jylla ba kin bud thik pa thik ia ki kyndon bala pynmih da ka Ministry of Hime Affairs (MHA) bala pynmih ha u snem 1975 bad 1977 bad ban phah ktien sha ki tnad Sorkar Pdeng ban pynthikna ba kin ai ia ka bhah ST ka Jylla Meghalaya tang ia ki trai ri trai muluk kiba shong ba sah ha Jylla (Khasi, Jaintia bad Garo).

“La kyntu ia ka Sorkar ba kan bthah iaki bor ba ai ST ba kin pdiang ia ki jingujor pyrshah ia ki briew ba don jingartatien bala ioh syrnot ST ha ki snem bala leit noh bad ban pynduh noh ruh ia ka hok ST hadien bala pynshisha bha ia ki kot ki sla” ula ong.

Kat kum ki kyndon ka MHA, u briew u lah ban kam ba u dei u SC/ST hala ki jaka shong duk bad u briew ba krih na kawei ka Jylla sha kawei pat kim lah satia ban kami a ka hok SC/ST ha ki jylla thymmai satang lada ki dei na kajuh ka Jaidbynriew ha kata ka Jylla.

Kala ong ruh ba ki briew kiba iashong kurim ba kiba dei na ka Jaidbynriew SC/ST kin ym lah ban long ki dkhot jong kata ka jaidbynriew.

Une u Nongialam ka KHNAM ula kynnoh ba ia kine ki kyndon ym shym la pyntreikam ha Meghalaya, kaba lam sha ka jingpyndonkam bakla ia ki syrnot ST da ki briew ki bym dei ki trai ri trai muluk jong ka Jylla.

Ulakdew ruh ia ki khep ba ki briew kila pynkylla ia ki kyrteng bad ki jait ban kam ia ka hok ST.

“La shem ruh ba ki don ki khep ha kaba ym shym la pynshisha bha ia ki kot ki sla haba ai ia ki syrnot ST ha Jylla Meghalaya, nalor kata, ki jingmyntoi ST kiba dei ban ioh tang ki trai shnong (Khasi, Jaintia bad Garo) ba sah ha Jylla la pynioh ruh ia ki riewlum ba shu wan krih na kiwei ki Jylla bad ba shu sah tang shipor ha Jylla. Kane kala paw bha haba don ki bhah ha ka thungkam ia ki ST ha ki Tnad ka Sorkar Pdeng ha Jylla” ula ong.

Une u Nongalam ka KHNAM ula ong ruh ba ki don bun ki khep ha kaba ki briew kila pynbna ialade hakhmat u Notary Public bad pynkylla ia ka kyrteng bad ka Jait kum ka nuksa Ruksana Parbeen (Muslim) sha ka Evaline Sumer (Khasi), Momin Khezar sha u Erick Sumer. Ula ban jur ba kum kine ki jingeh ki buh ha ka jingma kaba khraw ia ka Jaidbynriew bad ka long pyrshah ruh ia ki kyndon jong ka MHA.

Haba kdew sha ka raly thungkam ba kyrpang ki BSF na ka bynta ka kam constable (GD) ia ki ST ha Meghalaya, u Bah Passah ula kyntu ia u Chief Secretary ban iakren bad ki bor shipai BSF ban pynthikna ba tang ki jaidbynriew Khasi, Jaintia bad Garo ka Jylla ki dei kiba la khein kum ki ST na ka bynta kane ka rally ka ban long kat kum ki kyndon ka MHA.