Shillong Nailar 13: U Myntri Rangbah ka Jylla u Conrad K Sangma ha ka miet jong ka sngi Baar ula plie ia ka madan Artificial Turf, ka Basketball Court bad ia ka Mushroom Cultivation Project ha ka Shnong Nongkseh, Upper Shillong ha ryngkat ka jingdon lang u Myntri ka tnad Sports and Youth Affairs u Bah Shakliar Warjri.
Haba ai jingkren ha ka jingialang u Conrad K Sangma ula ong “Nga dap da ka jingsngewhun ban iohi ia kaei kaba la leh ha ka shnong Nongkseh namar kala don ka jingkylla kaba shisha bad wat ki nongshong shnong ruh kin mynjur lang ia kane ka jingsakhi ia ki kam kaba la leh ha kane ka shnong”.
Ula ong ruh ba kane kam dei satia tang ka madan football hynrei kadei ka dak ka shin jongka jingkiew shaphrang bad la leh ia ki kam ban wanrah ia ka jingkylla bad ula ong ruh ba yn ym lah ban khmih lynti ba mar iadep shna ia kane ka madan kin mih noh mardor ki nongialehkai ban ialehkai ia ka World Cup hynrei kan shim por ban saindur ia ka sap ka phong jong ki nongialehkai na ka bynta ki pateng ban dang wan.
Ha kaba iadei bad ka Mushroom Mission, u Conrad ula ong ba kane kadei ka projek kaban wanrah ia ka jingkylla da kaba iatreilang bad ka ri Japan naduh ka jingpyndonkam ia ki tiar ki tar ki bapher bapher bad ia u tit uba pynmih yn ym die tang tang hapoh ka jylla ne hapoh ka ri hynrei yn die ruh ha ki iew kiba don ha kylleng ki ri.
Haba phai sha ka roi ka par ula ong, ba ha ka khana ban kyntiew shaphrang ia ka roi ka par jylla, ka long kaba donkam bha ba baroh kin donbynta lang bad khlem ki nongrep, ki samla bad ki longkmie kane ka khana jong ka jingkiew shaphtang jongka roi ka par kan ym lah ban urlong satia.
Ha kane ka jingplie ia kine ki projek la iadonlang u u MLA ka Mylliem u Bah RV Lyngdoh, u MLA barim ka Mylliem u Bah Hamletson Dohling uba long ruh u Nongaibuit jong u Myntri Rangbah ka jylla, u Chief Secretary ka jylla u Bah DP Wahlang, ka Deputy Commissioner ka Kong RM Kurbah, u SP ka East Khasi Hills u Bah Vivek Syiem, ki heh ophisar sorkar, ki nongialam shnong Nongkseh, ki nongialam bad ki nongialehkai jong ka Nongkseh Sports and Cultural Club bad kiwei kiwei.
Ia ka madan Artificial Turf la shna ha ka jinglut jingsep kaba kot T.2.4 Klur bad ka Mushroom Cultivation Project kaba T.1.05 Klur bad ia ka madan ialehkai Basketball la tei hapoh ka 10 sngi.
Kum ka dak ban ai jingkyrshan ia ka Nongkseh Sports and Cultural Club u Bah Hamletson Dohling ula ai ka song jingiarap kaba T.1 lak ia ka Nongkseh Sports and Cultural Club bad ula aiti ia kane ha u President ka NSCC u Bah Daniel Thangkhiew.
