Shillong Naialr 12: Ka NorthEast United FC kala pynkut ia ka jingiakhun ia ka Group Stage jongka Durand Cup da kaba iakhaid da 2-2 bad ka Rangdajied United FC kaba la long mynnin ka sngi Nyngkong ha Jawaharlal Nehru Stadium.
U Bekey Oram ula thep ia ka kol ha ka minit kaba 24 bad u Jairo Samperio ula thep ia ka kol ha ka 76 minit na ka bynta ka NorthEast United FC ha kaba kala pynkut ia ka jingiakhun da kaba bat ia ka kyrdan kaba nyngkong ha ka Group ‘E’ da kaba kamai 7 point na ki 3 tylli ki jingiakhun.
Ka NorthEast United FC kala ioh rung sha ka quarterfinal jong kane ka lympung iakob ialehkai football.
U coach Juan Pedro Benali ula wanrah ia ka jingpynkylla ia ki nongialehkai da kaba pynneh thik tang ia u Chema Nunez na ka jingjop ia ka Shillong Lajong FC. Ha kane ka jingiakhun la sakhi ia ki nongialehkai kiba kynthup ia u nongap kol u Arman Tamang, u Robin Yadav, Mohammed Arshaf bad u Jairo Samperio.
Ka NEUFC kala ioh ban ialehkai bha ha ka minit kaba 23 ha kaba u Chema ula pynbuh iaka bol u Thoi Singh uba la ioh ban tam kylla ia ki nongap shadien jong ka Rangdajied hynrei u Thoi ula shah pynur noh hajan kol bad u rephri khlem ka jingartatien ula kdew da ka penalty, kumta u Bekey Oram ula mih shakhmat ban leit shut ia ka penalty bad khlem ka jingbakla ula ioh ban the pia ka kol kaba nyngkong ka jingu na ka bynta ka NorthEast United FC.
Kane ka jingioh thep kol ka NEUFC kam shym la pynduh jingkyrmen ia ka Rangdajied hynrei hapoh ka kylla step kala ioh ban thep kylla 2 kol kata ha ka 32 minit lyngba u Lawphniaw bad u Umdor ha ka minit kaba 44 bad kila tam kylla shi kol ia ka NEUFC.
Ha ka kylla miet ka NEUFC kala bteng ban ialehkai bha bad kala pyrshang ia ki lad ki lynti ban ioh ban pyniakhaid hynrei dei ha ka minit kaba 76 ba u Jairo Samperio ula thep ia ka kol kaba la pyniakhiad syndon ia kane ka jingiakhun da 2-2.
Watla ka jingiakhun kala iakhaid hynrei ka Rangdajied kala tur shakhmat ban ialeh ban ioh thep kol bad hashwa ban kut noh ka jingialehkai, u nongap kol ka NEUF ula pyni ia la ka sap da kaba iada ia ka bol ban ioh rung shapoh kol ia kaba la shut jam da u nongialehkai jong ka Rangdajied United FC.
