Shillong, Nailar 11: Ka Committee on Government Assurances ka iing dorbar thawain ka Meghalaya ha ka sngi Nyngkong, ka la pynlong ia ka jingleit jurip ia ki jaka ba don ki karkhana bad ki jaka rep ha Ri-Bhoi District, haba ban jur ia ki lad kiba bun ha kam ri jingri ban pynlong kum ka lad kamai kaba neh na ka bynta ki samla ka Jylla.
Iaka Committee on Government Assurances la ïalam da u Chairman Bah Renikton Lyngdoh Tongkhar haka jingdonlang kiwei ki MLA naduh u Dr Celestine Lyngdoh, u Bah Matthew B Kurbah, bad u Bah Ollan Singh Suin.
Ka Committee kala leit jngoh ïa ka Poultry Feed Manufacturing Unit bad ka RNB Cement Plant Ltd ha Umiam Industrial Area bad ka jaka ri syiar jong ka Sorkar Jylla ha Kyrdemkulai.
Haba pynpaw ïa ka jingsngewkmen halor ka jingsumar ïa ka jaka ri syiar, u Bah Renik u la ong ba ka jingbha bad ka jinglong jong ka jaka ri syiar jong ka Sorkar ka ïahap kyrdan bad ki jong ki riew shimet, da kaba ai khublei ïa ki nongtrei bad ka Animal Husbandry & Veterinary na ka bynta ka jingtrei shitom jong ki.
U Bah Renik ula ban jur ba katei ka jaka ri syiar ka lah ban long kum ka jaka ai jinghikai ia ki nongrep bad ki nongseng kam seng jam bad kiba kwah ban long ki nongrep, khamtam ia ki samla kiba la nang la stad ki bym lah ban ioh kam Sorkar.
“Ka kam ri jingri ka don shibun ka lad bad ka jingdawa kaba khraw ha ka Jylla”, la ong u Bah Renik “Ngi pynshlur ïa ki samla ban shim ïa ka kum ka lad kamai kaba lah ban kamai bha. Ka Poultry Farm jong ka Sorkar ka lah ban pynmih ym tang ïa ki syiar kiba bha hynrei ki lah ban pynmih ruh ïa ki nongri kiba tbit, bad ngi kyntu ïa ka tnat ban pyniar ïa ka bor jong ka ban pynbiang ïa ka jingdawa bad ban thaw kam kham bun.”
