Shillong, Nailar 11: Ka Dr. Mazel Ampareen Lyngdoh kaba dei ka myntri sorkar ba peit ia ka tnad ka koit ka khiah jong ka jylla kala pynpaw ba ki samla pule kiba don shisha ïa ka thong ha ka jingim, ki dei ban pynkhlaiñ ïalade ban lait na ki jingshah pynshoi kiba lah ban wan bun rukom ban pynpulom noh ïa ka thong jong ki.
Ia kane, ka Dr. Ampareen kala pynpaw ha ka jingïalang pynkup burom ïa ki 70 ngut ki samla pule kiba pass bha ha ka SSLC bad HSSLC kaba la pynlong da ka NPYF Shillong City ha kane ka sngi Saitjain.
Haba kren kum ka kongsan, ka Dr. Mazel Ampareen Lyngdoh kala ong, to shim ïa ka rai ban pynskhem ïalade da kaba ong ba u ksuid um dei ban ïohlad ban khring ne pynshoi ïa ngi ki khun samla.
Shuh shuh ka Myntri ka ong ruh ba ka sngewkmen haduh katta katta ban ïohi ba don ki samla pule kiba ïoh haduh 95 ne 97 persen bad kumta ka ong ba kine ki ai jingkyrmen ruh ïa ka lawei jong ka jylla.
Tangbah, ka ong ruh ba khatduh hi na bynta ki samla pule kam dei satia ka pisa lane ki mark hynrei khatduh kadei ka jingsuk bad ka jinglait jong ki na ki jingshah pynshoi ha ka jingim.
Ka la ong ruh ba naduh u Naiwieng jong u snem ban wan, ka jylla kan sa sakhi ïa ka jingkylla kaban ai jingkyrmen ïa ki nongïakhun kam kaban pyntikna ba yn ym don shuh kiban ïoh leh thok ha ki eksam kam ha ki kyrdan kiba kham shapoh ba pynïaid da ka District Selection Committee.
