Jowai, Nailar 11 : Kawei ka Bolero Camper, ba niah da u nongniah bala shoh khaw-iang, kala rat haduh 5 tylli ki kali ha ka miet Sngi Saitjain ha ka shnong Mihmyntdu, West Jaintia Hills bad wanrah ia ka jingmynsaw ia bun ngut ki briew.
Kat kum ka khubor Pulit, kane ka jingjia kala jia hapdeng ka por 7:30 baje mynmiet haduh 8 baje eiei hajan ka Mihmyntdu Durbar Hall.
Kane ka Bolero Camper ba don u nombor ML04-D-8952, ba niah da u Dominic Pasi (25) ba na shnong Nongjngi, ka dei kaba wan na ka thain Lathlaboh ban leit sha Mihmyntdu hapdeng ka jingniah sted bha. Kane ka kali kala leit tynrah nyngkong eh ia ka Bolero ML01-7922 ba pyndonkam da u District Transport Officer (DTO) ka East Jaintia Hills, na ka taiar dien bad wanrah ia ka jingjulor ia kane ka kali hynrei ki briew ba hapoh kim shym la mynsaw satia.
Hadien kane, kane ka Camper kala leit rat sa ia ka local taxi ML04-D-7572 ba niah da u samla 27 snem Pyndap Dhar ba na shnong Ialong. Kane ka taxi kala julor klai bha bad u nongniah bad uba shong ha poh, kila mynsaw. Ia kine la pynkit noh sha Civil Hospital, Jowai da ki briew kiba iaid ba ieng ha ka thain.
Kane ka Camper bala pynher sted bha, kala leit pat ban tynrah sa ia kawei ka Breeza ML04-D-8095 ba pynieng kumba 25-30 meter bad pynjulor ia ka taiar dien. Kumba 20-25 shakhmat, kane ka Camper kala leit ban tynrah biang sa ia kawei ka local taxi ML04-D-7427 ba niah da u rangbah ba 45 snem Lakhon Khariah ba na Nongjngi, uba dang wan mar pyrshah. U Bah Lakhon ula mynsaw ba la pynkit ia u sha Civil Hospital.
Kane ka jingleit rat kali kane ka Boleroa Camper kala kut hadien ba ka poi iaid sha ka liang mar pyrshah bad leit tynrah sa ia kawei ka local taxi ML04-A-0721 ba dang pynieng harud.
Ki Pulit ki iathuh ba ha ka jingtohkit la shem ba u Pasi ula shoh khaw-iang ba pynlong ia u ban niah lamwir lamtham ia ka kali.
Ia une u briew ruh la pynkit sha Jowai Civil Hospital hadien kine ki jingjia. Ia ki kali baroh la tan noh da ki Pulit sha Police Reserve ha Jowai ban nang pynlong shuh shuh ia ka jingtohkit.
