Shillong, Nailar 09: Ka Dorbar Shnong Lower Lumparing kala pynpaw ia ka jingsngew dap ram jongka ia u MLA ka thain u Bah Sanbor Shullai namar ka jingpynkylla dur ka jong u ia ka shnong naduh ba ula long kum u MLA da kaba pynioh ia bun bun tylli ki project hapoh jong ka shnong ka thaw.
Kane ka jingpynsngew jong ka Dorbar Shnong Lower Lumparing kadei mynta ka sngi ka 9 tarik u Nailar, hadien ba u Bah Sanbor Shullai kynsan kynsan ula leit ban jurip ia ki lai tylli ki project kiba la kot haduh T.11 klur tam khnang ban pynsted ia ka kam.
Kine ki lai tylli ki project kiba u Bah Sanbor ula leit ban jurip mynta ka sngi kadei ia ka surok ba la pyniasoh na surok shnong ka ban mih sha ka jaka thang briew jong ka Seng Khasi bad kumjuh ruh sha u lum jingtip ki riewngeit Muslim, Ka Urban Primary Health Centre bad ia ka surok ka ban pynpoi sha kane ka jaka ai jingsumar.
Ia u Bah Sanbor ha ka por ba leit ban jurip la synran lang da ki ophisar ka tnad ka koit ka khiah, ki ophisar ka tnad PWD, u Rangbah Shnong, u Secretary Shnong kumjuh ruh u Rangbah Dong bad ki Seng Kynthei jong ka shnong nalor kiwei pat.
Haba ia kren bad ki lad pathai khubor hadien ba la dep ban jurip, u Bah Sanbor u la pynpaw ia ka jingkmen bad ka jingsngewhun ka jong u ban iohi ba ki kam baroh kila iaid sted bha bad un ym slem shuh ba yn sa lah ban pyndep ia ki.
Ula ong ruh ha kaba iadei bad ka jaka ai jingsumar ia kane ka yn sa lah ban pyndep noh ha u bnai Nohprah mynta u snem bad ynda la aiti ia kane sha ka shnong kan long shisha ka jingkyrkhu ba khraw ia baroh ki paidbah nongshong shnong.
Ha kajuh ka por u Bah Sanbor ula ai khublei ia u Myntri Rangbah ka jylla u Conrad K Sangma bad khamtam eh ia ki arngut ki Symbud Myntri Rangbah ka jylla kiba ju kloi ban kner ia ki kti ban iarap ia ki paidbah jong ka South Shillong Constituency da ki kam pynroi ki bapher bapher hapoh ki shnong ki thaw.
